تہران کے خطیب جمعہ نے کہا ہے کہ عالمی سطح پر امریکی طاقت روز بروز زوال کا شکار ہوتی جارہی ہے اور امریکا کے سلسلے میں اقوام عالم کی نفرتوں میں بھی اضافہ ہوتا جارہا ہے۔

تہران کے خطیب جمعہ حجت الاسلام کا ظم صدیقی نے اس ہفتے نماز جمعہ کے خطبوں میں چار نومبر عالمی سامراج کے خلاف جد وجہد کے قومی دن اور تہران میں امریکی سفارتخانے یا جاسوسی کے اڈے پر قبضے کی سالگرہ کے موقع پر نکالی گئی ریلیوں کا ذکرکیا اور کہا کہ ایران کے اسلامی انقلاب نے دنیا میں پہلی بار امریکا کی ہیبت کا بت پاش پاش کیا اور ایک سپر پاور کے طور پر امریکا کی حیثیت کو خاک میں ملادیا۔

تہران کے  خطیب جمعہ نے ایرانی عوام کے خلاف امریکا کی گذشتہ چالیس برسوں کی پابندیوں اور دھمکیوں کا ذکرکرتے ہوئے کہا کہ ان ظالمانہ پابندیوں کی وجہ سے ایرانی عوام آج اپنے پیروں پر خود کھڑے ہوگئے ہیں اور اقتصادی، سیاسی اور سائنسی میدانوں میں بھی خود مختار ہوگئے ہیں۔ انہوں نے کہا کہ اس کے ساتھ ہی علاقے میں ایران کے اثر و رسوخ میں بھی زبردست اضافہ ہوا ہے۔

حجت الاسلام کاظم صدیقی نے اس بات کا ذکرکرتے ہوئے کہ گذشتہ چالیس برسوں کے دوران ایرانی عوام سے محاذ آرائی کے دوران امریکا کو ہمیشہ شکست ہو‏ئی ہے کہا ایران کے خلاف اب امریکی پروپیگنڈے کا کوئی اثر نہیں ہے اور اس وقت عالمی سطح پر امریکا کے تئیں نفرتوں میں اضافہ ہوتا جا رہا ہے۔