مہر خبررساں ایجنسی کی رپورٹ کے مطابق رہبر معظم انقلاب اسلامی حضرت آیت اللہ العظمی خامنہ ای نے نرس ڈے کی مناسبت سے نرسوں کے ایک گروپ اور شہدائے صحت کے اہلخانہ کے ساتھ ملاقات میں گذشتہ 42 سال کے حوادث و واقعات کی طرف اشارہ کرتے ہوئے فرمایا: اگر حقائق کو بیان نہ کیا گيا تو دشمن جھوٹے پروپیگنڈے کے ذریعہ ظالم اور مظلوم کی جگہ بدل دےگا۔

رہبر معظم انقلاب اسلامی نے کربلا کی شیر دل خاتون حضرت زینب سلام اللہ علیھا کی ولادت اور نرس ڈے کی مناسبت سے مبارکباد پیش کرتے ہوئے فرمایا: کربلا کی عظيم الشان خاتون حضرت زینب سلام اللہ علیھا نے عملی طور پر ثابت کردیا ہے کہ عورت کی عزت و عظمت کو ماضی اور حال میں نشانہ بنانے والے ستمگروں کی کوششوں کے باوجود  عورت صبر و تحمل کا ایک عظيم سمندر اور عقل و خرد کی عظیم بلندی پر فائز ہوسکتی ہے ۔

رہبر معظم انقلاب اسلامی نے حضرت زینب (س) کی شاندار استقامت اور عظیم الشان خطبوں کی طرف اشارہ کرتے ہوئے فرمایا: حضرت زینب(س) نے حقائق کو بیان کرکے یزید ملعون کے دربار میں ہلچل مچا دی اورحضرت زینب (س) کے خطبے  کوفہ میں توابین کے قیام کا سبب بن گئے۔ حضرت زینب (س) نے حقائق اور واقعیات کو بیان کرکے دشمن کو حقائق بدلنے کی اجازت نہیں دی۔

رہبر معظم انقلاب اسلامی نے فرمایا: معاشرے ، سماج اور تاریخ کے حقائق کو بیان کرنا چاہیے ورنہ دشمن ظالم کی جگہ مظلوم اور مظلوم کی جگہ ظالم سے تبدیل کردےگا۔

رہبر معظم انقلاب اسلامی نے نرسوں کے اقدامات کی اہمیت کی طرف اشارہ کرتے ہوئے فرمایا: نرسیں بیماروں کی تیمارداری ،صحت و سلامتی کے سلسلے میں اپنے آرام و آسايش کو نظر انداز کرکے انھیں آرام و سکون فراہم کرنے کی کوشش میں مصروف رہتی ہیں ۔ نرسوں کا حق قوم کے ہر فرد کی گردن پر ہے۔

رہبر معظم انقلاب اسلامی نے فرمایا: نرسوں اور میڈيکل عملے نے دفاع مقدس کے دوران اور کورونا وبا کے دوران گرانقدر خدمات انجام دی ہیں اور یہی وجہ ہے کہ اللہ تعالی انھیں اجر مضاعف عطا کرےگا۔

رہبرمعظم انقلاب اسلامی نے نرسوں کے مطالبات کے مسئلے پر تاکید کرتے ہوئے فرمایا: نرسنگ کمیونٹی کو مضبوط کرنا ملک کے حال اور مستقبل کی ایک اہم ضرورت ہے اور متعلقہ حکام کو نرسنگ کمیونٹی کے مطالبات کو پورا کرنے پر خاص توجہ مبذول کرنی چاہیے۔

رہبر معظم انقلاب اسلامی نے اللہ تعالی کی ذات پر توکل، اعتماد اور تلاش و کوشش پر تاکید کرتے ہوئےفرمایا: ایرانی قوم کا مستقبل درخشاں اور تابناک ہے اور اللہ تعالی ایرانی قوم کو دشمنوں پر فتح اور کامیابی عطا فرمائےگا۔