غزہ کے اسپتالوں میں رضاکارانہ خدمات انجام دینے والے امریکی ڈاکٹروں اور نرسوں نے وائٹ ہاؤس کو خط لکھ کر  غزہ میں فوری جنگ بندی اور اسلحے کی فراہمی  پرپابندی کامطالبہ کیا ہے۔ 

امریکی میڈیا کے مطابق 45 امریکی ڈاکٹرز اور نرسوں کےگروپ نے صدر جوبائیڈن اور نائب صدرکملا ہیرس کوخط لکھا۔

امریکی میڈیا کے مطابق خط میں کہا گیا ہے کہ ہم نے غزہ میں جو دیکھا اس پر ہم خاموش نہیں رہ سکتے، غزہ میں بچوں کو جان بوجھ کر زخمی کیاگیا، ہم میں سے ہر ایک نے روز ایسے بچوں کا علاج کیا جنہیں سر اور سینے میں گولی ماری گئی۔

دستخط کنندگان کے خط میں کہا گیا ہے کہ چاہتے ہیں آپ وہ ڈراؤنےخواب دیکھیں جو ہمیں واپس آنےکے بعد پریشان کررہے ہیں، خواہش ہے کہ آپ ہمارے ہتھیاروں سے معذور اور زخمی بچوں کے خواب دیکھیں، خواب میں زخمی بچوں کی بے قرار مائیں ہم سے ان کی جان بچانے کی منت کرتی ہیں، آپ وہ چیخیں سن سکیں جو ہمارا ضمیر ہمیں بھولنے نہیں دیتا۔ 

امریکی ڈاکٹرز کا کہنا ہےکہ ہم اسرائیل کے غزہ پرحملےکے انسانی نقصانات پر تبصرےکےلیے اچھی پوزیشن میں ہیں، اسرائیل اور تمام فلسطینی مسلح گروپوں کو اسلحےکی فراہمی پرپابندی لگائی جائے، فوری اور مستقل جنگ بندی تک اسرائیل کی فوجی، سفارتی اور اقتصادی مدد روکی جائے۔ 

رپورٹ کے مطابق امریکی ڈاکٹرز نے اپنے خط میں لکھا کہ امریکی قانون اور بین الاقوامی انسانی قانون کے تحت ہماری حکومت ایساکرنےکی پابند ہے۔