اسلامی جمہوریہ ایران کے وزیر دفاع امیر حاتمی اور جاپان کے وزیر دفاع نے ٹیلیفون پر گفتگو کی۔ اس گفتگو میں ایرانی وزیر دفاع نے کہا کہ کشیدگی کے خاتمہ کے لئے خطے سے امریکی فوج کا انخلا ضروری ہے۔ امیر حاتمی نے کہا کہ امریکہ نے ایک دوسرے ملک کے سرکاری افسر کو ایک تیسرے ملک میں شہید کیا ہے اور امریکہ کا یہ اقدام دہشت گردی کے زمرے میں آتا ہے ۔ امریکہ عالمی قوانین کو مسلسل نقض کررہا ہےاور دیگر ممالک کے اندرونی معاملات میں بے جا مداخلت کررہا ہے۔امریکہ خطے میں کشیدگی اور دہشت گردی کے فروغ کا اصلی سبب ہے۔ اس گفتگو میں جاپان کے وزير دفاع نے کہا کہ جاپان کشیدگی کے خاتمہ کے لئے اپنا کردار ادا کرنے کے لئے آمادہ  ہے۔

اسلامی جمہوریہ ایران کے دارالحکومت تہران میں نماز جمعہ حجۃ الاسلام حاج علی اکبری کی امامت میں منعقد ہوئی ، جس میں لاکھوں مؤمنین نے شرکت کی۔ خطیب جمعہ نے سپاہ اسلام کے عظیم اور مایہ ناز شہید میجر جنرل سلیمانی کی تشییع جنازہ عوام کی وسیع پیمانے پر شرکت کو اسلامی مزاحمتی محاذ کا ریفرنڈم قراردیتے ہوئے کہا کہ  شہید قاسم سلیمانی نے خطے میں امن و صلح برقرار کرنے اور دہشت گردی کے خاتمہ میں اہم کردار ادا کیا ۔

انھوں نے کہا کہ شہید سلیمانی کی شہادت کا اثر ایران سمیت پوری دنیا میں دکھائی دیا اس کی اصل وجہ ان کا تقوی ہے وہ ایک فوجی کمانڈر ہونے کے ساتھ ایک متقی اور پرہیزگار انسان بھی تھے۔ وہ شرعی حدود کے پابند انسان تھے ، ان کی دشمنوں کے ساتھ رفتار بھی اسلامی ، انسانی اور اخلاقی اصولوں پر استوار تھی۔

خطیب جمعہ حاج علی اکبری نے کہا کہ میجر جنرل شہید قاسم سلیمانی الہی، علوی، فاطمی، حسینی مکتب کے تربیت یافتہ فرزند تھے اور آج یہ مکتب دنیا میں امام خمینی (رہ) کے تربیتی مکتب سے پہچانا جاتا ہے۔ انھوں نے کہا کہ جب میں نے شہید سلیمانی کی شہادت کی خبر سنی تو مجھے حضرت علی (ع) کا متقین کی صفات کے بارے میں خطبہ یاد آگیا، جب ہم حضرت علی علیہ السلام کے خطبہ نمبر 110 میں متقین کی خصوصیات کا مطالعہ کرتے تو ہمارے ذہن میں  ہر صفت پر شہید قاسم سلیمانی کی شخصیت جلوہ گر ہوتی تھی۔ انھوں نے کہا کہ شہید قاسم سلیمانی نے اسلامی مزاحمتی محاذ کو مضبوط کیا ۔  ان کی حیات بھی دشمنوں کے لئے بہت سخت اور دشوار تھی اور ان کی شہادت نے بھی دشمنوں کے آرام و سکون کو سلب کرلیا ہے۔ خطیب جمعہ نے کہا کہ شہید سلیمانی اور شہید ابو مہدی مہند کی شہادت در حقیقت امریکہ کی موت ہے اور خطے سے امریکہ کے خاتمہ کی تحریک کا آغاز ہوگیا ہے اورسلیمانی کے طرفداروں نے اس سلسلے میں سخت انتقام کا آغاز کردیا ہے۔

خطیب جمعہ نے تہران میں ہوائی سانحہ کی طرف اشارہ کرتے وہئے کہا کہ اس دیگر افراد کے ساتھ ایران کی بعض ممتاز یونیورسٹیوں کے ممتاز طلباء بھی جاں بحق ہوئے ہیں یہ ایک تلخ حادثہ تھا۔ اورعالمی قوانین اور معیاروں کے مطابق  اس حادثہ کی تحقیقات کا آغاز کردیا گیا ہے۔ خطیب جمعہ نے آیت اللہ سید ہاشم رسولی محلاتی کی وفات پر بھی تعزیت پیش کرتے ہوئے کہا کہ مرحوم آیت اللہ رسولی محلاتی بہترین محقق، مؤلف اور مؤرخ تھے۔

حسینیہ امام خمینی (رہ) میں رہبر معظم انقلاب اسلامی  اور ہزاروں افراد کی موجودگی میں امریکہ کے دہشت گردانہ حملے میں شہید ہونے والے  سپاہ اسلام کے مایہ ناز مجاہد میجر جنرل شہید قاسم سلیمانی، مجاہد عظیم ابو مہدی مہندس  اور ان کے شہید ساتھیوں کی یاد میں مجلس ترحیم منعقد ہوئی ۔

مجلس ترحیم میں تینوں قوا کے سر براہان ، ملک کےاعلی سول و فوجی حکام ، بعض وزراء ، بعض عراقی حکام ، اسلامی مزاحمت کے بعض نمائندوں اور غیر ملکی سفراء نے شرکت کی۔ عراق کی قومی سلامتی کونسل اور حشد الشعبی کے سربراہ فالح الفیاض نے عراقی حکام اور عوام کی نمائندگی میں سپاہ اسلام کے عظيم کمانڈر میجر جنرل سلیمانی کی شہادت پر رہبر معظم انقلاب اسلامی اور ایرانی عوام کو تعزیت اور تسلیت پیش کرتے ہوئے کہا: ہمارے لئے بہت ہی دردناک ، سخت اور سنگین ہے کہ ان عزیزوں اور سرافراز شہیدوں کا پاک خون ، سید الشہداء کی سرزمین پر گرایا گیا۔ ان دلیر شہیدوں کو خراج عقیدت پیش کرنے کے لئے عراقی عوام نے متحد ہوکر ان عزیز کمانڈروں کی خدمات پر ان کا شکریہ ادا کیا۔

جناب فیاض نے شہید ابو مہدی مہندس کو خراج عقیدت پیش کرتے ہوئےکہا : شہید ابو مہدی مہندس نے شہید قاسم سلیمانی کے ہمراہ تکفیریوں کا مقابلہ کرنے اور عراق میں امن و سلامتی برقرار کرنے میں اہم کردار ادا کیا اور سرانجام دونوں شہیدوں کا خون اور گوشت بھی ایکدوسرے کے ساتھ مخلوط ہوگیا۔

مجلس ترحیم سے حجۃ الاسلام والمسلمین صدیقی نے میجر جنرل شہید سلیمانی کے ممتاز اور برجستہ خصائل اور خصوصیات کی طرف اشارہ کرتے ہوئے کہا: شہید میجر جنرل سلیمانی عظیم مجاہد  ، منصوبہ ساز، بیدار، ہوشیار اور فاتح کمانڈر ہونے کے ساتھ  صدیقہ کبری سلام اللہ علیھا کو نمونہ عمل بناتے ہوئےولایت کے مکمل طور پر مطیع اور فرمانبردار تھے اور ان کی شہادت بھی ان کی حیات کی طرح اسلام اورانقلاب اسلامی کی عزت ،عظمت اور سرافرازی کا باعث بنی۔

مجلس ترحیم میں قاریان قرآن  نے کلام اللہ مجید کی تلاوت کی اور اہلبیت علیھم السلام کےمداحوں نے حضرت فاطمہ زہرا سلام اللہ علیھا کے مصائب میں نوحہ خوانی کی اور شہید قاسم سلیمانی سمیت مجاہدین اسلام اور جہاد کی فضیلت اور عظمت کے بارے میں اشعار پیش کئے۔

 ایرانی سپاہ کی ایئر فورس کے کمانڈر جنرل امیر علی حاجی زادہ نے صحافیوں سے گفتگو کرتے ہوئےکہا ہے کہ  عین الاسد میں امریکی ایئر بیس پر ایران کے میزائل حملے امریکہ کے لئے تباہ کن ثابت ہوئے، ایران نے امریکہ کا رعب و دبدبہ ختم کردیا ہے خطے میں امریکہ کے تمام فوجی اڈے ایرانی میزائلوں کے نشانے پر ہیں۔ انھوں نے کہا کہ امریکہ نے بغداد ايئر پورٹ کے قریب شہید حاج قاسم سلیمانی کو بزدلانہ طریقہ سے شہید کرکے تاریخی غلطی کا ارتکاب کیا ہے ، امریکہ کی یہ اسٹراٹیجک  غلطی ہے جس کی بنا پر خطے سے امریکہ کا خاتمہ ہوجائےگا  اور امریکہ نے اپنے اس دہشت گردانہ اقدام سے خطے میں اپنے ہزاروں فوجیوں کی جانوں کو خطرے میں ڈال دیا ہے۔

انھوں نے کہا کہ ہم نے ابھی شہید سلیمانی کے پاک اور ناحق خون کا بدلہ نہیں لیا ابھی ہم نے اپنی پہلی جھلکی دکھائی ہے اگر امریکہ خطے سے نکل گیا تو ٹھیک، ورنہ ہم  اسے خطے سے نکال کر دم لیں گے اور اس خطے سے امریکہ کا اخراج ہی شہید سلیمانی کے پاک خون کا اصلی بدلہ ہوگا۔

جنرل حاجی زادہ نے کہا کہ ہم نے پوری صورتحال کا محاسبہ کرتے ہوئے عراق میں امریکہ کے ايئر بیس عین الاسد کو میزائلوں سے نشانہ بنایا اور ہم اپنے مقاصد میں کامیاب ہوگئے اور ہم نے ہدف کوپہلے ہی حملے میں مکمل طور پر تباہ کردیا۔

جنرل حاجی زادہ نے کہا کہ امریکہ کے صدر ٹرمپ کا بیان امریکی اور عالمی رائے عامہ کو گمراہ کرنے کے لئے ہے اگر امریکی صدر اپنے اس بیان میں سچے ہیں کہ ایرانی میزائل حملے میں امریکہ کا کوئی فوجی ہلاک نہیں ہوا تو صحافیوں کو وہاں جانے کی اجازت دیں پھر سچ اور جھوٹ کا سب کو پتہ چل جائےگا۔

انھوں نے کہا کہ عین الاسد میں امریکی ڈرون، ہیلی کاپٹر اور دیگر جنگی وسائل مکمل طور پر تباہ ہوگئے۔ امریکیوں نے اپنے فوجیوں کے جنازوں اور زخمی فوجیوں کو اسرائیل اور بعض دیگر اتحادی ممالک میں منتقل کیا ہے ۔ جنرل حاجی زادہ نے کہا کہ خطے میں ایک نئی روح اور نیا عزم پیدا ہواہے۔ جس طرح حزب اللہ اور حماس نے اسرائیل کی طاقت کا طلسم توڑ دیا اسی طرح  ایران نے امریکہ کی طاقت کے طلسم کو توڑدیا ہے ہم جنگ نہیں چاہتے لیکن ہم خطے میں امریکی موجودگی کے بھی خلاف ہیں ۔ امریکہ خطے میں عدم استحکام پیدا کررہا ہے اور دہشت گردی کو فروغ دے رہا ہے۔ امریکہ علاقائي ممالک اور عالمی قوانین کو توڑ رہا ہے۔

جنرل حاجی زادہ نے کہا کہ ہم نے میزائل حملوں کے علاوہ دشمن پر سائیبر حملہ بھی کیا اور ان کے ڈرون طیاروں کا کنٹرول ان کے ہاتھوں سے چھین لیا اور ہمارے اس اقدام سے امریکیوں پر مزيد خوف و ہراس طاری ہوگیا۔ ہم نے اپنے بیان میں واضح کیا کہ اگر امریکہ نے مزید کسی شرارت کا ارتکاب کیا تو ہمارا اگلا جواب بہت ہی سخت اور دنداں شکن ہوگا۔ انھوں نے کہا کہ اسرائیل خطے میں امریکہ کے تمام سنگین جرائم میں برابر کا شریک ہے۔ اسرائیل کے ہاتھ فلسطینی، لبنانی، شامی، عراقی اور یمنی مسلمانوں کے خون سےر نگین ہیں لہذا ہم اسے کبھی معاف نہیں کریں گے۔

جنرل حاجی زادہ نے کہا کہ ہم کسی کو قتل کرنےکی تلاش و کوشش میں نہیں ، بہرحال اس حملے میں درجنوں امریکی فوجی مارے گئے ہیں ہمارے پاس شواہد موجود ہیں کہ انھوں نے بڑی تعداد میں زخمی فوجیوں کو اسرائل منتقل کیا ہے۔ انھوں نے کہا کہ امریکہ پہلے ہی حملے میں خوفزدہ ہوگیا اور اس نے جوابی حملہ نہیں کیا ورنہ ہم تو 48 گھنٹوں میں 5 ہزار امریکی فوجیوں کی لاشیں ان کے ہاتھ پر رکھتے۔ انھوں نے کہا کہ امریکہ اور خطے کی عافیت اسی میں ہے کہ امریکہ اس خطے سے نکل جائے ۔ جنرل حاجی زادہ نے کہا کہ امریکہ دوسرے ممالک کو صرف رعب و دبدبہ اور دھونس سے مرعوب کرلیتا ہے لیکن وہ ایران کے ساتھ ایسا نہیں کرسکتا کیونکہ ایران ایک بڑا اور با عزت ملک ہے اور ایران امریکی دھونس میں آنے والا نہیں۔ ہمارا اللہ تعالی کی ذات پر پختہ ایمان ہے ہم کسی کے ساتھ زیادتی نہیں کریں گے لیکن ہم کسی کی زیادتی کو برداشت بھی نہیں کریں گے۔ہم پر فوجی حملہ کیا گیا ہے ہمارے عظیم جنرل کو شہید کیا گیا ہے ہم ابھی پہلا قدم اٹھایا ہے۔

تحریر: زین عباس
 

قال رسول اللّه إذا کانَ یَوْمُ القیامَةِ نادی مُنادٍ یا أَهْلَ الجَمْعِ غُضُّوا أَبْصارَکُمْ حَتی تَمُرَّ فاطِمَة

ترجمہ: رسولِخداؐ نے فرمایا: روزِ قیامت ایک منادی نداء دے گا کہ اے اہلِ قیامت اپنی آنکھوں کو بند کر لو، کیونکہ اب یہاں سے فاطمہ کا گزر ہونے والا ہے.(1)

قال رسول اللّه کُنْتُ إذا اشْتَقْتُ إِلی رائِحَةِ الجنَّةِ شَمَمْتُ رَقَبَةَ فاطِمَة.

ترجمہ: رسولِخداؐ نے فرمایا: میں جب بھی جنت کی خوشبو کا مشتاق ہوتا ہوں تو فاطمہ سے اس خوشبو کو سونگھتا ہوں.(2)

قال رسول اللّه حَسْبُک مِنْ نساءِ العالَمیَن أَرْبَع: مَرْیمَ وَآسیَة وَخَدیجَة وَفاطِمَة.

ترجمہ: رسولِخداؐ نے فرمایا: تمام جہانوں میں فقط چار عورتیں بہترین ہیں، مریمؑ، آسیہؑ، خدیجہؑ اور فاطمہؑ.(3)

قال رسول اللّه یا عَلِی هذا جبریلُ یُخْبِرنِی أَنَّ اللّهَ زَوَّجَک فاطِمَة.

ترجمہ: رسولِخداؐ نے فرمایا: اے علیؑ ابھی مجھے جبرائیلؑ نے خبر دی ہے کہ خداوند نے فاطمہؑ کی شادی تم سے کردی ہے.(4)

قال رسول اللّه ما رَضِیْتُ حَتّی رَضِیَتْ فاطِمَة.

ترجمہ: رسولِخداؐ نے فرمایا: میں کبھی بھی کسی سے راضی نہیں ہوا، مگر یہ کہ فاطمہ اس سے راضی ہو جائے.(5)

قال رسول اللّه یا عَلِیّ إِنَّ اللّهَ أَمَرَنِی أَنْ أُزَوِّجَکَ فاطِمَة.

ترجمہ: رسولِخداؐ نے فرمایا: اے علیؑ خداوند نے مجھے حکم دیا ہے کہ میں فاطمہ کی شادی تم سے کر دوں.(6)

قال رسول اللّه إِنّ اللّهَ زَوَّجَ عَلیّاً مِنْ فاطِمَة.

ترجمہ: رسولِخداؐ نے فرمایا: خداوند نے علیؑ کی شادی فاطمہؑ سے کی ہے.(7)

قال رسول اللّه أَحَبُّ أَهْلِی إِلیَّ فاطِمَة.

ترجمہ: رسولِخداؐ نے فرمایا: میرے اہلبیتؑ میں سے میرے نزدیک سب سے زیادہ محبوب فاطمہؑ ہے.(8)

قال رسول اللّه خَیْرُ نِساءِ العالَمین أَرْبَع: مَرْیَم وَآسیة وَخَدِیجَة وَفاطِمَة.

ترجمہ: رسولِخداؐ نے فرمایا: جہان کی تمام عورتوں کی سردار چار خواتین ہیں.. مریمؑ، آسیہؑ، خدیجہؑ اور فاطمہؑ۔(9)

قال رسول اللّه سیّدَةُ نِساءِ أَهْلِ الجَنَّةِ فاطِمَة.

ترجمہ: رسولِخداؐ نے فرمایا: جنت کی تمام عورتوں کی سرور و سردار فاطمہؑ ہیں.(10)

قال رسول اللّه أَوَّلُ مَنْ یَدْخُلُ الجَنَّةَ: عَلیٌّ وَفاطِمَة.

ترجمہ: رسولِخداؐ نے فرمایا: جنت میں سب سے پہلے علیؑ اور فاطمہؑ داخل ہوں گے. (11)

قال رسول اللّه أُنْزِلَتْ آیَةُ التطْهِیرِ فِیْ خَمْسَةٍ فِیَّ، وَفِیْ عَلیٍّ وَحَسَنٍ وَحُسَیْنٍ وَفاطِمَة.

ترجمہ: رسولِخداؐ نے فرمایا: آیت تطہیر پنجتن پاک میرے، علیؑ، حسنؑ، حسینؑ اور فاطمہؑ کی شان میں نازل ہوئی ہے.(12)

قال رسول اللّه أَفْضَلُ نِساءِ أَهْل الجَنَّةِ: مَرْیَمُ وَآسیةُ وَخَدیجَةُ وَفاطِمَة.

ترجمہ: رسولِخداؐ نے فرمایا: اہل جنت کی عورتوں میں سے سب سے افضل مریمؑ، آسیہؑ، خدیجہؑ اور فاطمہؑ ہیں.(13)

قال رسول اللّه أَوَّلُ مَنْ دَخَلَ الجَنَّةَ فاطِمَة.

ترجمہ: رسولِخداؐ نے فرمایا: سب سے پہلے جنت میں فاطمہؑ داخل ہوں گی.(14)

قال رسول اللّه المَهْدِیِ مِنْ عِتْرَتی مِنْ وُلدِ فاطِمَة.

ترجمہ: رسولِخداؐ نے فرمایا: امام مہدی میرے اہلبیتؑ میں سے ہے کہ جو فاطمہؑ کی اولاد میں سے ہیں.(15)

حوالاجات کتب اہلسنت:

(1)کنزالعمّال، ج13، ص:91 و 93.منتخب کنزالعمّال بهامش المسند، ج5، ص:96.الصواعق المحرقة، ص:190. أسدالغابة، ج5، ص:523.تذکرةالخواص، ص279.ذخائرالعقبی، ص:48.مناقب الإمام علی لابن المغازلی، ص:356.نورالأبصار، ص:51 و 52. ینابیع المودّة، ج2، باب56، ص:136.

(2)منتخب کنزالعمّال، ج5، ص:97. نورالأبصار، ص:51.مناقب الإمام علی لابن المغازلی، ص:360.

(3)مستدرک الصحیحین، ج3، باب مناقب فاطِمَة، ص:171.سیرأعلام النبلاء، ج2، ص:126. البدایةوالنهایة، ج2، ص:59.مناقب الإمام علی لابن المغازلی، ص:363.(4) مناقب الإمام علی من الریاض النضرة، ص:141.(5) مناقب الإمام علی لابن المغازلی، ص:342.(6) الصواعق المحرقة، باب11، ص:142. ذخائرالعقبی، ص30 و 31.تذکرةالخواص، ص:276.مناقب الإمام علی من الریاض النضرة، ص:141. نورالأبصار، ص:53.

(7) الصواعق المحرقة، ص:173.(8) الجامع الصغیر، ج1، ح203، ص:37.الصواعق المحرقة، ص:191. ینابیع المودّة، ج2، باب59، ص:479.کنزالعمّال، ج13، ص:93.

(9) الجامع الصغیر، ج1، ح4112، ص:469. الإصابةفی تمییزالصحابة، ج4، ص:378.البدایةوالنهایة، ج2، ص:60.ذخائرالعقبی، ص:44.

(10) کنزالعمّال، ج13، ص:94.(11) نور الأبصار، ص:52/ شبیه به آن در کنزالعمّال، ج13، ص:95.

(12) إسعاف الراغبین، ص:116. صحیح مسلم، کتاب فضائل الصحابة.(13) سیرأعلام النبلاء، ج2، ص:126. ذخائرالعقبی، ص:44.

(14) ینابیع المودّة، ج2، ص:322 باب56.(15) الصواعق المحرقة، ص:237

.......

تحریر: نذر حافی


فوجی اڈہ کیا ہوتا ہے؟ بہت سارے لوگوں کے ذہنوں میں لارہ اڈے جیسی ہی کوئی چیز ہوتی ہے، کچھ کے اذہان میں فوجی اڈہ ایک ممنوعہ علاقہ ہوتا ہے، جس میں کچھ فوجی بیرکیں ہوتی ہیں، وہاں فوجی حضرات رہتے ہیں، کھاتے پیتے اور ورزش وغیرہ کرتے ہیں۔ المختصر جتنی جس کی معلومات ہوتی ہیں، ویسا ہی اس کے ذہن میں فوجی اڈے کے بارے میں نقشہ بھی ہوتا ہے۔ ایرانیوں نے کہا تھا کہ ہم سخت انتقام لیں گے، انہوں نے یہ انتقامی حملہ چھپ چھپا کر، اچانک اور خاموشی سے نہیں کیا بلکہ پانچ دن اور رات مسلسل وارننگ دینے کے بعد عین رات کے اسی وقت یہ حملہ کیا، جس وقت قاسم سلیمانی پر حملہ کیا گیا تھا۔ اگر یہ حملہ چھپ چھپا کر ہوتا تو پھر شاید امریکیوں میں اور ایرانیوں میں اس حوالے سے کوئی فرق نہ ہوتا۔

دوسری اور اہم بات یہ ہے کہ عراق میں حشد الشعبی کے ذریعے پہلے دن سے عراقی عوام کو امریکی اڈوں سے دور رہنے کی بار بار تاکید کی گئی تھی۔ جس کے نتیجے میں کوئی ایک بے گناہ عراقی بھی ہلاک نہیں ہوا اور اس بات کی حکومت عراق نے بھی تصدیق کی ہے۔ تیسری اور اہم بات جو دیکھنے میں آئی وہ یہ کہ ایران نے حملے سے پہلے عراق کی سالمیت اور خود مختاری کا احترام کرتے ہوئے اور سفارتی آداب کو ملحوظ خاطر رکھتے ہوئے عراقی حکومت سے باقاعدہ اجازت لی، یعنی امریکہ کی طرح نہیں کہ جہاں چاہا، وہاں حملہ کر دیا اور جتنے لوگ مرتے ہیں، مر جائیں۔

اب سب سے اہم بات یہ ہے کہ ایران نے عین الاسد کے فوجی اڈے کو ہی نشانہ کیوں بنایا!؟ حالانکہ اس سے پہلے اور نزدیک ترین امریکی اڈے موجود تھے، جو آسانی سے نشانہ بن سکتے تھے۔ جو لوگ جغرافیے، تحقیق اور جنگی تدابیر پر نظر رکھتے ہیں، وہ اچھی طرح جانتے ہیں کہ یہ فوجی اڈہ عراق کے مغرب میں، صوبہ الانبار میں اور شام کی سرحد کے بالکل نزدیک واقع ہے۔ یعنی ایران نے تقریباً سب سے دور ترین اڈے کو نشانہ بنایا ہے۔ سوچنے کی بات ہے کہ اس قدر دور ترین مقام پر حملہ کرنے کی ضرورت کیا تھی؟ اس حملے سے ایران نے جہاں ایک طرف امریکہ اور اسرائیل کو یہ پیغام دیا ہے کہ وہ اپنی عسکری طاقت کے حوالے سے جب عین الاسد کو ویران کرسکتا ہے تو باقی اڈے تو اس کی بغل میں ہیں۔ دوسری بات جو عین الاسد پر حملے کا باعث بنی، وہ خود عین الاسد کی اہمیت ہے۔

عین الاسد عراق میں امریکہ کا سب سے مرکزی، مضبوط اور جدید ترین ہتھیاروں سے لیس فوجی اڈہ تھا۔ اس کی مساحت اور رقبہ پچاس کلومیٹر مربع میل ہے۔ اس میں حملے کے وقت چار ہزار امریکی فوجی، بیس ہیلی کاپٹر اور تیس لڑاکا تیارے موجود تھے۔ صرف یہی نہیں، یہ اڈہ دراصل امریکیوں کی جنت کہلاتا تھا، اس میں ایک ایسا  شہر آباد تھا، جس میں عیش و نوش اور دنیا کی ہر عیاشی کا سامان تھا، یہی وہ اڈہ ہے، جہاں پر داعش اور اس طرح کے دیگر دہشت گرد ٹولوں کو تربیت دینے کے بعد آگے دھکیلا جاتا تھا، اس اڈے میں دہشت گردوں کے لئے ایک شاندار مسجد بھی بنائی گئی تھی۔ اس اڈے کی اہمیت اور طاقت کا اندازہ اس سے لگائیں کہ امریکہ کی اعلیٰ شخصیات جب عراق آتی تھیں تو اسی اڈے میں قیام پذیر ہوتی تھیں۔ حتیٰ کہ گذشتہ سال ٹرمپ بھی اپنی اہلیہ کے ساتھ جب عراق آیا تھا تو اسی اڈے پر اس کا استقبال کیا گیا تھا اور یہی اڈہ اس کی سرگرمیوں کا مرکز تھا۔ چنانچہ اس اڈے کو عراق میں امریکہ کا دارالحکومت کہا جاتا تھا۔

جیسا کہ ٹرمپ نے کہا تھا کہ قاسم سلیمانی کے قتل کا حکم میں نے جاری کیا تھا، اس حکم پر عملدرآمد کا پیغام اسی عین الاسد کے اڈے سے اجرا کیا گیا تھا۔ چنانچہ عین الاسد کی یہ اہمیت خود یہ تقاضا کرتی تھی کہ اگر قاسم سلیمانی کا انتقام لینا ہے تو پھر کم از کم عین الاسد کے اڈے سے انتقام شروع کیا جائے۔ یہاں تک ایک بات ہر عقل مند اور سمجھدار آدمی کو سمجھ آتی ہے کہ ایرانیوں نے سخت انتقام کا آغاز ضرور کیا ہے، لیکن ایرانی اندھے انتقام کے قائل نہیں ہیں، ایرانیوں کا یہ عسکری انتقام اپنی جگہ جاری رہے گا، لیکن دراصل اقتصادی، سیاسی، ثقافتی، سفارتکاری اور اسلامی وحدت کے میدانوں میں امریکی و اسرائیلی مفادات کا صفایا کرنے میں ایرانی تیزی سے کامیابی کی طرف بڑھ رہے ہیں۔ امریکی و اسرائیلی مفادات کے خلاف مختلف میدانوں میں ایران کی اس وقت کیا صورتحال ہے، اس پر ان شاء اللہ اگلی قسط میں بات کریں گے۔

بدھ کو یوم شہید کے موقع پر اپنے خطاب میں انصار اللہ کے سیکریٹری جنرل عبدالملک بدرالدین الحوثی کا کہنا تھا کہ امریکہ نے جنرل قاسم سلیمانی کو شہید کرکے عالمی قوانین کو پامال اور ریڈ لائن کو توڑا دیا ہے۔انہوں نے کہا کہ امریکہ اور اسرائیل اسلام کے اصل دشمن ہیں اور وہ اپنی شیطانی چالوں کے ذریعے مسلمانوں کو مسلسل نقصان پہنچا رہے ہیں۔
 
انصار اللہ یمن کے سربراہ نے یہ بات زور دے کر کہی کہ خطے کی بعض حکومتیں امریکہ کی غلام ہیں اور واشنگٹن کے مفادات کو آگے بڑھانے میں مصروف ہیں۔ انہوں نے کہا کہ امریکہ اور اسرائیل کی جارحیت کا مقابلہ کرنا عین جہاد ہے۔عبدالملک بدرالدین الحوثی نے واضح کیا کہ ان کی تنظیم ایران، لبنان، عراق، شام، فلسطین اور ہر اس ملک کے ساتھ ہے جسے امریکہ کی جارحیت کا سامنا ہے۔انہوں نے امریکہ کا کاسہ لیس بن جانے کے  باعث سعودی عرب پر کڑی نکتہ چینی کرتے ہوئے کہا کہ سعودی حکام ایسے وقت میں امریکی صدر کی تعریفوں کے پل باندھ رہے جب خود امریکی عوام انہیں احمق قرار دیتے ہیں۔