قرآن تحریف ناپذیر معجزہ ہے

قرآن رسول کریم صلی اللہ علیہ و آلہ وسلم کی نبوت کی حقانیت پر اللہ کی طرف سے ایک معجزہ ہے:

وَاِنَّہٗ لَكِتٰبٌ عَزِيْزٌ۝۴۱ۙ لَّا يَاْتِيْہِ الْبَاطِلُ مِنْۢ بَيْنِ يَدَيْہِ وَلَا مِنْ خَلْفِہٖ۝۰ۭ تَنْزِيْلٌ مِّنْ حَكِيْمٍ حَمِيْدٍ۝

یہ ایک بالادست کتاب ہے، باطل نہ اس کے سامنے سے آسکتا ہے، نہ پیچھے سے، یہ حکمت والے لائق ستائش (رَبْ)کی نازل کردہ ہے۔ (۴۱ حمٓ سجدۃ:۴۱۔۴۲)

یہ بات ممکن نہیں ہے کہ اللہ تعالیٰ کسی نبی کو معجزہ عنایت کرے، پھر وہ معجزہ ناتمام رہ جائے یا اس معجزے کی طرف باطل قوتوں کو اپنا ہاتھ دراز کرنے کا موقع مل جائے۔ کیا یہ ممکن ہے کہ حضرت موسیٰ (ع) کے معجزات ان کے بیرونی دشمن فرعون اور داخلی دشمن سامری کی دست درازی کی زد میں آ جائیں؟ حاشا و کلا۔

دشمنانِ اسلام نے قدیم زمانے سے اپنی سازشیں اس بات پر مرکوز رکھیں کہ قرآن کو مخدوش اور متنازعہ بنائیں۔ بدقسمتی سے خود امت قرآن کے بعض افراد محض فرقہ وارانہ تعصب کے باعث اس پروپیگنڈے کو ہوا دینے میں دشمنوں کے ہمدوش ہو گئے کہ فلاں فرقہ تحریف قرآن کا قائل ہے۔ یہ نادان اتنا بھی نہیں جانتے کہ وہ اس الزام سے قرآن کومشکوک بنا رہے ہیں۔ نظریاتی مخالفین سے عناد اور جاہلانہ تعصب کی وجہ سے ا ن کے فہم و ادراک کی صلاحیت ماند پڑ جاتی ہے۔ حتیٰ کہ اگر ہمارے سارے علماء اپنا اجماعی موقف بیان کریں کہ ہمارے نزدیک تحریف قرآن کا نظریہ سراسر باطل، فرسودہ اور شواذ میں شامل ہے اور ایسے شواذ کسی مسلک و مذہب میں قابل اعتنا نہیں ہوتے، پھر بھی یہ لوگ نہیں مانتے۔ حالانکہ امانت و دیانت کا کوئی شائبہ ہوتا تو اس حد تک بہتان تراشی اور کذب وافترا کا ارتکاب نہ کرتے اور کچھ خوف خدا کرتے۔

، اسلامی جمہوریہ ایران کی سرزمین کے خلاف صہیونی جارحیت کے بعد، جبکہ یورپی ممالک نے یا تو خاموشی اختیار کر رکھی ہے یا اسرائیل کی اپارتھائیڈ ریاست کا ساتھ دے رہی ہیں، دنیا بھر سے اسرائیل کی اس حرکت پر مذمتی پیغاموں کا سلسلہ جاری ہے۔

دنیا بھر کے ممالک، حکومتی دہشت گردی سے عاری دنیا کے خواہاں

حکومت یمن

یمن کی حکومت نے اسلامی جمہوریہ ایران کے اقتدار اعلی کے خلاف صہیونی اقدام کے خلاف مسلم امہ اور عرب دنیا کو متحد ہونے کی اپیل کی۔ یمن کے بیان میں کہا گیا ہے کہ صہیونیوں کا یہ اقدام پورے علاقے پر جارحیت کے مترادف ہے۔

اس بیان میں مزید کہا گیا ہے کہ یمن کی حکومت ایرانی عوام اور حکومت کے ساتھ کھڑی رہے گی جو فلسطین اور لبنانی عوام اور ان کے حقوق کے دفاع کے لیے صہیونی حملوں کی زد میں آئے ہیں۔

مصر

مصر کی وزارت خارجہ نے اپنے باضابطہ بیان میں کہا ہے کہ ہر اس اقدام کی مذمت کی جاتی ہے جس سے علاقے کی سیکورٹی اور استحکام متاثر اور جھڑپوں میں اضافہ ہو۔ مصر کی وزارت خارجہ نے علاقے اور دنیا کی سلامتی کو خطرے سے دوچار کرنے والے ہر جھڑپ کے سلسلے میں بھی خبردار کیا۔

اردن

اردن کی وزارت خارجہ نے ایران پر صہیونی جارحیت کو، تہران کے اقتدار اعلی اور عالمی قوانین کی خلاف ورزی قرار دیا۔ اردن کی وزارت خارجہ کے بیان میں ایران پر صہیونیوں کے جارحانہ حملے کو ایک خطرناک اقدام قرار دیا گیا ہے جس سے علاقے میں موجودہ کشیدگی میں اضافہ ہوگا۔

سعودی عرب

سعودی عرب کی وزارت خارجہ نے ایران پر صہیونی ریاست کے ناجائز حملے کی مذمت کی اور اسے ایران کے اقتدار اعلی اور عالمی قوانین کی خلاف ورزی قرار دیا۔

قطر

قطر کی وزارت خارجہ نے ایران پر صہیونیوں کی فوجی جارحیت کی مذمت کی اور ایک باضابطہ بیان بھی جاری کیا۔ اس بیان میں خطے میں کشیدگی بڑھنے کے حوالے سے تشویش ظاہر کی گئی اور تمام فریقوں سے درخواست کی گئی کہ صبر و تحمل سے کام لیں۔

متحدہ عرب امارات

متحدہ عرب امارات نے خلیج فارس کے اطراف کے دیگر ممالک کی طرح ایران پر صہیونی جارحیت کی مذمت کی۔

سوئٹزرلینڈ

سوئٹزرلینڈ کی وزارت خارجہ نے ایکس سوشل میڈیا پلیٹ فارم پر جاری ہونے والے اپنے بیان میں ہفتے کی صبح ایران پر ہونے والی صہیونی جارحیت کی مذمت کی اور کشیدگی کے خاتمے کا مطالبہ کیا۔

کویت

کویت کی وزارت خارجہ نے بھی اسلامی جمہوریہ ایران پر صہیونی حملے کی شدید الفاظ میں مذمت کی اور زور دے کر کہا کہ اس حملے سے واضح ہوگیا ہے کہ تل ابیب اپنی جارحانہ پالیسی اور خطے کے ملکوں کی ارضی سالمیت کی خلاف ورزی کے ذریعے علاقے میں خلفشار پھیلانا چاہتا ہے۔

ملائیشیا

ملائیشیا کی وزارت خارجہ نے ایران پر صہیونی حملے پر میں مذمتی بیان جاری کیا۔ ملائیشیا کی وزارت خارجہ نے اپنے بیان میں کہا: ہفتے کی صبح کو ہونے والے اسلامی جمہوریہ ایران پر حملے کی مذمت کرتے ہیں اور اسے بین الاقوامی اصولوں کی کھلی خلاف ورزی اور علاقے کے استحکام کے لئے سنجیدہ خطرہ قرار دیتے ہیں۔

عمان

عمان کی وزارت خارجہ کے بیان میں کہا گیا ہے کہ صہیونیوں کا یہ اقدام ایران کے اقتدار اعلی اور بین الاقوامی قوانین کی کھلی خلاف ورزی اور حالات کو مزید کشیدہ کرنے اور تشدد جاری رکھنے کی کوشش ہے اور ان حرکتوں سے علاقے مین قیام امن اور سفارتکاری کی کوششیں ناکام رہ جائیں گی۔

شام

شام کی وزارت خارجہ نے بھی اسلامی جمہوریہ ایران پر صہیونی جارحیت کو قابل مذمت قرار دیا اور کہا کہ صہیونیوں نے ایران اور شام کے اقتدار اعلی اور دونوں ممالک کی ارضی سالمیت اور حرمت کو پامال کیا اور بین الاقوامی قوانین اور اقوام متحدہ کے منشور کو کچل کر رکھ دیا۔

پاکستان

پاکستان کی وزارت خارجہ کے بیان میں اسلامی جمہوریہ ایران پر صہیونی جارحیت کی مذمت کی گئی اور اسے عالمی قوانین کی کھلی خلاف ورزی قرار دیا گیا۔ پاکستان کی وزارت خارجہ نے اقوام متحدہ کی سلامتی کونسل سے اسرائیل کے جرائم کو روکنے کے لیے عملی قدم اٹھانے کا مطالبہ کیا۔

عراق

عراق کی حکومت کے جاری کردہ بیان میں صہیونی جارحیت کی سخت الفاظ میں مذمت کی گئی اور اسلامی جمہوریہ ایران کے شانہ بشانہ ڈٹے رہنے کا اعلان کیا گیا۔

لبنان

لبنان کی وزارت خارجہ نے اسلامی جمہوریہ ایران کے خلاف صہیونی جارحیت کو ناقابل قبول اور لائق مذمت قرار دیا۔

افغانستان

افغانستان کی طالبان انتظامیہ کی وزارت خارجہ کی جانب سے غاصب اسرائیلیوں کے حملے کی مذمت کی گئی اور اسے علاقے میں کشیدگی پھیلانے کی کوشش قرار دیا گیا۔

روس

روس کی وزارت خارجہ نے ایران کے خلاف صہیونی ریاست کے جارحانہ حملے کو ناقابل قبول قرار دیا۔ روس کے بیان میں آیا ہے کہ ایران کو اشتعال دلانے کی کوششوں کا خاتمہ ہونا چاہئے کیونکہ اس طرح کی کوششیں علاقے کے امن و استحکام کے لیے سنجیدہ خطرہ ہیں۔

اس کے علاوہ دنیا بھر کی سیاسی شخصیات نے بھی ایران پر صہیونی جارحیت کی مذمت کی ہے۔

پاکستانی قومی اسمبلی کے اسپیکر

پاکستان کی پارلیمنٹ اسپیکر سردار ایاز صادق نے اس حملے کی مذمت کرتے ہوئے اسے صہیونیوں کے جارحانہ رویے اور تسلط پسندی کی علامت قرار دیا جس نے علاقے کے استحکام کو خطرے میں ڈال دیا ہے۔

وزیر اعظم شہباز شریف

پاکستان کے وزیر اعظم شہباز شریف نے بھی اسلامی جمہوریہ ایران پر صہیونی جارحیت کی مذمت کی۔ انہوں نے علاقے میں کشیدگی بڑھنے کی جانب سے تشویش کا اظہار کیا اور کہا کہ پاکستان امن اور سلامتی کی خاطر ایران کے ساتھ کھڑا رہے گا۔

عمان کے وزیر خارجہ

عمان کے وزیر خارجہ بدر البوسعیدی نے بھی صہیونیوں کی غاصبانہ پالیسی کے خلاف عالمی قدم اٹھانے پر زور دیا۔

عراق کے سید عمار حکیم

عراق کی حکمت ملی تحریک کے سربراہ سید عمار حکیم نے کہا ہے کہ عالمی برادری صہیونیوں کے جارحانہ رویے کو جو بین الاقوامی منشور اور اصولوں کے خلاف ہے، مل کر روکنے کی کوشش کرے۔

سابق افغان صدر حامد کرزئی

افغانستان کے سابق صدر حامد کرزئی نے بھی اپنے ایکس اکاؤنٹ پر جاری پیغام میں لکھا ہے کہ اسلامی جمہوریہ ایران کی سرزمین پر (غاصب) اسرائیلیوں کا حملہ، افغانستان کے ہمسایہ اور برادر ملک کے اقتدار اعلی کی خلاف ورزی ہے۔

عراقی صدارتی دفتر

عراق کے صدر کے دفتر سے جاری ہونے والے بیان میں صہیونیوں کے اس اقدام کو بین الاقوامی قوانین اور ملکوں کے اقتدار اعلی کی کھلی خلاف ورزی اور علاقے میں بدامنی پھیلانے کے مترادف قرار دیا گیا۔

عراقی صدر تحریک

عراق کی صدر تحریک کے سربراہ سید مقتدا صدر نے اس اقدام کی سخت الفاظ میں مذمت کی اور کہا کہ صہیونیوں کی یہ جارحیت اتنی کمزور تھی کہ اس کے نتیجے میں یہ ریاست اور اس کے حامی حیرت زدہ اور پریشان ہوکر رہ گئے ہیں۔

فلسطین کی مقاومتی کمیٹیاں

فلسطین کی مقاومتی کمیٹیوں نے باضابطہ بیان جاری کرکے اسلامی جمہوریہ ایران کے ساتھ اپنی یکجہتی کا اعلان کیا۔ اس بیان میں غاصب اسرائیلیوں کے اس حملے کو صہیونی- امریکی منصوبہ قرار دیتے ہوئے کہا گیا ہے کہ ایران کے وعدہ صادق کارروائیوں کے بعد صہیونی بری طرح پریشان، آشفتہ حال اور وحشت زدہ ہوگئے تھے اور یوں انہوں نے اس جارحیت کا ارتکاب کیا جو کہ شکست سے دوچار ہوئی اور تل ابیب کی کمزوری اور دفاعی بے بسی پردہ پہلے سے زیادہ چاک ہو گیا۔

حرکۃ المقاومۃ الاسلامیہ "حماس"

حماس تنظیم نے صیوہنیوں کے اس اقدام کو شدید الفاظ میں مذمت کی اور اسے ایران کی ارضی سالمیت اور اقتدار اعلی کو متاثر کرنے اور علاقے میں بدامنی کی آگ بھڑکانے کے مترادف قرار دیا۔

عوامی محاذ برائے آزادی فلسطین

عوامی محاذ برائے آزادی فلسطین نے اپنے بیان میں کہا ہے: ہم ایران کے دفاع کے حق اور صہیونیوں کو سزا دینے کے حق، کی حمایت کرتے ہیں۔ صہیونی ریاست کو اپنے اہداف کے حصول میں شکست کا سامنا کرنا پڑا ہے اور اپنے اور علاقے کی عوام کے دفاع کے لیے ایران کی پوزیشن کو اور بھی مضبوط کردیا ہے۔

تحریک انصار اللہ یمن

یمن کی انصاراللہ تحریک نے فلسطین کی حمایت میں ایران کے ثابت قدم ہونے کو سراہا اور غاصب اسرائیلیوں کے اس حملے کی سخت الفاظ میں مذمت کی۔

مغرب کا منافقانہ رویہ

دوسری جانب سے مغربی حکومتوں کے موقف پر سوالیہ نشان اٹھتا جا رہا ہے جو ایک جانب انسانی حقوق اور عالمی قوانین کی پابندی کا ڈھنڈورا پیٹتے رہتے ہیں لیکن میدان عمل میں ظالم، جارح اور مجرم ریاستوں اور ٹولوں کا ساتھ دیتے ہیں۔

برطانیہ

ان میں سے ایک برطانوی وزیر اعظم کیئر اسٹارمر ہے جس نے دونوں فریقوں سے تحمل کا مظاہرہ کرنے کی تلقین کی اور ایران سے اس حملے پر ردعمل ظاہر نہ کرنے کی اپیل کی جبکہ وہ اس حملے سے پہلے صہیونیوں کے جارحانہ منصوبوں پر خاموش رہا یا پہلے کی طرح ان کا ہاتھ بٹاتا رہا۔

فرانس

فرانس کی وزارت خارجہ نے صہیونیوں کی جارحیت کی مذمت کئے بغیر، تہران کی جانب صبر کا مظاہرہ کرنے کی اپیل کی ہے۔

یورپی یونین

یورپی یونین کی ترجمان برائے خارجہ امور نبیلہ مسرالی نے صہیونی جارحیت کی مذمت کیے بغیر، تمام فریقوں سے صبر و تحمل کے مظاہرے کی درخواست کی اور صہیونی جارحیت کو محض "جوابی حملہ" قرار دیا۔

جب صلیبی جنگوں میں اہل مغرب اسلام اور مسلمانوں سے روبرو ہوئے اور انہوں نے اسلامی تہذیب و تمدن کی عظمت کا مشاہدہ کیا اور اسلامی دنیا میں علم کی ترقی سے آشنا ہوئے تو انہیں بہت حیرت ہوئی اور یہی سامنا مغربی تہذیب کی ترقی کا باعث بھی بنا۔ انہوں نے اسلام اور مشرقی دنیا سے مختلف قسم کے علوم حاصل کرنے کے ساتھ ساتھ اپنی استعماری خصلت کے باعث غیر مغربی سرزمینوں پر تسلط اور قبضہ جمانے کی کوشش بھی جاری رکھی۔ مغربی دنیا نے ایک طرف اپنی پسماندگی کی وجہ کلیسا کو قرار دیا اور ہیومن ازم اور سیکولرازم کو فروغ دیا جبکہ دوسری طرف مشرقی دنیا، خاص طور پر اسلامی تہذیب سے حاصل ہونے والے علوم کو مزید ترقی دے کر غیر عرب سرزمینوں پر استعماری تسلط پیدا کرنے کے گوناگون ہتھکنڈے فراہم کیے۔ مغربی دنیا میں ہیومن سائنسز سے لے کر سائنس اور ٹیکنالوجی تک اکثر علوم کی ترقی اسی استعماری سوچ اور نگاہ سے انجام پائی ہے۔
 
مثال کے طور پر، ہیومن سائنسز کے اینتھروپولوجی اور مشرق شناسی جیسے شعبوں میں اصل مقصد غیر مغربی معاشروں کو اپنا مطیع بنانا تھا جبکہ فوجی اور میڈیا شعبوں میں میں ترقی کا مقصد بھی مختلف ممالک اور قوموں پر استعماری تسلط قائم کرنا تھا۔ پوری جرات سے کہا جا سکتا ہے اور تحقیق بھی اس کی تصدیق کرتی ہے کہ اگر آج مغربی تہذیب خود کو اقتصادی لحاظ سے غنی اور سیاسی لحاظ سے طاقتور تہذیب محسوس کرتی ہے تو یہ سب کچھ دیگر قوموں کا خون چوس کر اور انہیں لوٹ کر حاصل کیا گیا ہے۔ دنیا کی مظلوم قوموں کی قتل و غارت سے لے کر ان قوموں کے قدرتی ذخائر کی لوٹ مار تک۔ مغربی تاریخ خون ریزی اور قتل و غارت سے بھری پڑی ہے۔ صلی جنگوں میں دسیوں لاکھ مسلمانوں کے قتل عام سے لے کر امریکہ میں لاکھوں سرخ پوست انسانوں کی نسل کشی اور افریقہ میں دسیوں لاکھ افراد کو غلام بنا کر ان کے قدرتی ذخائر کی لوٹ مار۔
 
حقیقت یہ ہے کہ غیر مغرب قوموں کی تاریخ کا بڑا حصہ، مغربی طاقتوں کی جانب سے ان کی قتل و غارت اور لوٹ مار، نیز مغربی طاقتوں کے استعماری تسلط کے خلاف آزادی کی تحریکوں پر مشتمل ہے۔ حتی اس بارے میں مختلف علمی حلقوں میں مغربی طاقتوں کی جانب سے دیگر اقوام پر استعماری تسلط جمانے کے لیے بروئے کار لائے گئے مختلف ہتھکنڈوں کے بارے میں وسیع پیمانے پر علمی تحقیقات بھی انجام پا چکی ہیں اور فرانتز فینن اور ایڈورڈ سعید جیسے متعدد مفکرین اور محققین اس بارے میں مختلف نظریات بھی پیش کر چکے ہیں۔ ظلم و ستم اور مجرمانہ اقدامات سے سرشار تاریخ کے باوجود، مغربی طاقتیں درپیش حالات میں ہمیشہ اپنی غلط اور یکطرفہ تعبیر دوسروں پر مسلط کرنے کی کوشش کرتی ہیں جبکہ انتہائی منافقت اور فریبکاری سے اپنی اخلاقی اور ثقافتی برتری کا پرچار بھی کرتی رہتی ہیں۔
 
جمہوریت پسندی اور انسانی حقوق کی حمایت جیسے خوبصورت اور دل موہ لینے والے نعرے، اسی مقصد کے لیے بنائے گئے ہیں اور عمل کے میدان میں وہ ان نعروں کو دوسروں پر ناجائز تسلط کے لیے بروئے کار لاتے ہیں۔ اگر ہم مغرب کے سیاسی ڈھانچوں کا گہرائی میں جائزہ لیں تو دیکھیں گے کہ مغرب میں کبھی بھی حقیقی جمہوریت وجود نہیں رکھتی تھی اور یہ محض ایک دعوا ہے لیکن یہی ہتھکنڈہ دیگر اقوام کو کنٹرول کرنے میں بہت مفید ثابت ہوا ہے۔ اسی طرح انسانی حقوق کا مسئلہ بھی ایسی حکومتوں کو کمزور کرنے اور دبانے کے لیے محض ایک ہتھکنڈہ ہے جو مغربی طاقتوں کی ہمسو نہیں ہوتیں۔ آج تو یہ حقیقت پوری طرح واضح ہو چکی ہے کہ انسانی حقوق کا مسئلہ مغربی حکمرانوں کی نظر میں کوئی اہمیت اور قدروقیمت نہیں رکھتا۔ آج غزہ اور لبنان میں انسانیت سوز جرائم کی تمام حدیں پار کی جا رہی ہیں۔ ہزاروں بیگناہ بچے اور خواتین بے دردی سے قتل ہو رہے ہیں۔
 
ہزاروں ٹن مورچہ شکن بم عام عوام اور اسپتالوں پر گرائے جا رہے ہیں۔ غزہ کا گھیراو کر کے لاکھوں بیگناہ انسانوں کو بھوکا رکھ کر انہیں موت کے دہانے پر لا کھڑا کیا گیا ہے۔ مقبوضہ فلسطین پر ایسی رژیم حکمفرما ہے جو صبح شام دوسروں کو دھمکیاں دینے میں مصروف ہے اور خون ریزی سے اس کا دل نہیں بھرتا۔ اس کے باوجود مغربی ممالک نے نہ صرف انسانی حقوق کی خلاف ورزی کے بارے میں ہلکی سی پریشانی کا اظہار تک نہیں کیا بلکہ پوری طاقت اور بے باکی سے بچوں کی قاتل غاصب صہیونی رژیم کی حمایت کرنے میں مصروف ہیں۔ البتہ دنیا کی مستضعف قوموں کے ہمراہ، مغربی قوموں کا ایک حصہ بیدار ہو چکا ہے اور مظلوم فلسطینیوں کے حق میں آواز اٹھانے میں مصروف ہے۔ لیکن اب تک مغربی تہذیب کا ڈھانچہ پوری طرح غاصب صہیونی رژیم کی فوجی، مالی، سیاسی، اخلاقی اور قانونی مدد کرنے میں مصروف ہے جس کے باعث یہ رژیم انسان سوز جرائم جاری رکھے ہوئے ہے۔
 
موجودہ مغربی تہذیب کی بنیاد بیگناہ انسانوں کے خون پر رکھی گئی ہے۔ مغربی تہذیب کی بنیاد سائنس اور ٹیکنالوجی پر نہیں بلکہ استعمار اور لوٹ مار پر استوار ہے۔ مغربی تہذیب کی نظر میں مغربی انسان اور غیر مغربی انسان میں فرق ہے اور وہ علیحدہ طبقے سے ہیں۔ رہبر معظم انقلاب آیت اللہ العظمی سید علی خامنہ ای نے اس بات پر زور دیا ہے کہ اگرچہ غاصب صہیونی رژیم کو شکست ہوئی ہے لیکن اس سے بڑی شکست مغربی تہذیب کو ہوئی ہے۔ شہید یحیی سنوار کی زندگی کے آخری لمحات کے بارے میں وائرل ہونے والی ویڈیو جسے خود صہیونیوں نے جاری کیا ہے، مغرب کی غیر انسانی تہذیب کے خلاف مظلوم قوموں کی جدوجہد کی علامت بن چکی ہے۔ ایک طرف اسلحہ سے لیس فوجی ہیں جو جدید ترین ٹیکنالوجیز کی مدد سے انسانوں کی قتل و غارت میں مصروف ہیں جبکہ دوسری طرف نہتے انسان ہیں جو اپنی آزادی کی جنگ لڑ رہے ہیں۔ مغربی ایشیا کا آج کا مںظر ایمان اور کفر کی جنگ کا منظر ہے جس میں فتح ایمان کی ہو گی۔

تحریر: حمید رضا نظری

 اسلامی جمہوریہ ایران نے کہا ہے کہ وہ کسی بھی "جارحیت" کا جواب دینے کا حق محفوظ رکھتا ہے، اسرائیل کو مناسب ردِعمل کا سامنا کرنا پڑے گا۔ غیر ملکی خبر رساں ادارے کے مطابق ایران کے فوجی حکام کا کہنا ہے کہ تہران کے قریب 3 مختلف مقامات پر حملوں کو ناکام بنانے کے لیے فضائی دفاعی نظام استعمال کیا گیا ہے۔ ایرانی خبر ایجنسی کے ذرائع کا کہنا ہے کہ ایران کسی بھی جارحیت کا جواب دینے کا حق محفوظ رکھتا ہے۔ ایرانی فوجی حکام نے کہا کہ اسرائیل کو مناسب ردِعمل کا سامنا کرنا پڑے گا، تہران کے قریب حملوں کو ناکام بنانے کے لیے فضائی دفاع نظام کا استعمال کیا۔ دوسری جانب ایرانی ایئر ڈیفنس کا کہنا ہے کہ اسرائیل نے تہران، خوزستان اور ایلام میں کئی فوجی مقامات پر حملے کیے، اسرائیل کے حملے فضائی دفاعی نظام کے ذریعے کامیابی سے ناکام بنائے گئے۔

ایرانی ایئر ڈیفنس نے کہا ہے کہ صہیونی جارحیت کے نتیجے میں کئی مقامات پر محدود پیمانے پر نقصانات ہوئے۔ اسرائیلی اور امریکی حکام کا دعویٰ ہے کہ ایران پر حملہ 3 مرحلوں میں کیا گیا، دوسرے اور تیسرے حملوں میں ایران کی میزائل اور ڈرون حملے کرنے کی صلاحیت کو نشانہ بنایا گیا ہے۔ واضح رہے کہ امریکی میڈیا کا کہنا تھا کہ اسرائیل نے ایران پر فضائی حملوں کا آغاز کر دیا ہے جبکہ ایران کے سرکاری میڈیا نے تہران میں دھماکوں کی تصدیق کر دی۔ اسرائیلی فوج نے یکے بعد دیگرے ایران میں فوجی اہداف پر 2 بار کئی فضائی حملے کیے ہیں، اسرائیل نے شام میں بھی متعدد فوجی تنصیبات کو نشانہ بنایا ہے۔

اسلامی جمہوریہ ایران کی جانب سے وعدہ صادق میزائل آپریشنز کے ردعمل میں سراسیمگی اور خوف کے عالم میں اسرائیلی جوابی حملے کی ناکامی سے ایران کی اعلیٰ سطح کی ڈیٹرنس پاور (دبدبہ) کا بھرپور اظہار ہوا ہے۔ ایران کے دفاعی نظام پر اسرائیلی حملے کے بعد چند پہلووں پر بات ہو رہی ہے۔ صہیونی دشمن کو محور مقاومت کی جانب سے چند سطحوں پر شدید جنگ کا سامنا ہے۔ پہلی سطح غاصب صیہونی ریاست کو اپنی سرحدوں کے اندر ہی فلسطین اور لبنان سے مزاحمت اور جنگ کا سامنا ہے۔ دوسری سطح دور سے یعنی عراق اور یمن سے شدید دباو اور طاقت کے انوکھے استعمال سے لرزہ دینے والی جنگ درپیش ہے۔ سب سے اہم ایران کیساتھ براہ راست جنگ ہے۔ یہ جنگ کی آخری سطح ہے۔ صیہونی دشمن ایران کے براہ راست جنگ میں محتاط ہے، اس کی وجہ ایرانی طاقت کا خوف ہے، اسی کو ماہرین صیہونی دشمن کیخلاف ڈیٹرنس کی پاور یا دبدبہ قرار دیتے ہیں۔

کچھ ماہرین کا خیال ہے کہ اسرائیلی حملے اسی وجہ سے محدود ہیں اور اسی تناظر میں اس کو امریکی حکومت سے بڑے پیمانے پر کارروائیاں نہ کرنے کی درخواست سے منسلک کیا جا رہا ہے۔ اسرائیل ایرانی میزائل پاور اور تہس نہس کر دینے والے جنگی ساز و سامان کی وجہ سے جنگ کو براہ راست ایران تک پھیلانے میں خوفزدہ ہے۔ وعدہ صادق 1 اور وعدہ صادق 2 میزائل آپریشنز کی وجہ سے صیہونی دشمن کی نیندیں حرام ہو چکی ہیں۔ ایران اسرائیل پر براہ راست حملوں کے ذریعے یہ ثابت کر چکا ہے کہ صیہونی رجیم کے خلاف حملہ نہ کرنیکی باتیں صرف ایک وہم ہے۔ ایران کے اسی خوف کیوجہ سے اسرائیل نے ایک محدود جوابی کاروائی کی ہے، وگرنہ اسی صیہونی ائیر فورس نے کیسے فلسطین اور لبنان کے شہروں کو دیدہ دلیری سے کھنڈرات میں تبدیل کر دیا ہے۔

دراصل صیہونی جس محدودیت کی بات کرتے ہیں، وہ ان کی منتخب کردہ نہیں بلکہ ایرانی جنگی تیاریوں کی وجہ سے مجبور ہیں کہ مخصوص دائرے سے باہر نہ نکلیں ورنہ یہ کسی کی پرواہ نہیں کرتے۔ فوجی کاروائی کی بجائے ان کا زیادہ زور نفسیاتی حربوں کے ذریعے خاص ماحول بنانے پر تھا، جس کے لئے انہوں نے ضد انقلاب قوتوں، سوشل میڈیا اور مغربی ذرائع ابلاغ کے ذریعے سافٹ پاور سے کام چلانے کی کئی کوششیں کی ہیں۔ اسی لئے اسرائیلی حملے کے بعد ضد انقلاب اسرائیل نواز میڈیا آوٹ لیٹس کو ان حملوں کے اھداف اور نقصانات بڑھا چڑھا کر دکھانے کا موقع نہیں ملا، نہ ہی مغربی میڈیا کے پاتھ کچھ آیا۔ ماہرین یہ بھی کہتے ہیں یہ وجہ ہے کہ ایران کے سامنے نہ ٹک سکنی والی صیہونی قوت دہشت گردی، تخریب کاری اور ففتھ کالم کے ذریعے نقصان پہنچانے میں مہارت کو استعمال کرتی ہے۔

صیہونی دشمن کو اس بات کا پتہ ہے کہ براہ راست تصادم میں ان کے بس میں نہیں، اس لئے اس سے اجتناب ہی میں عافیت ہے۔ اسی تناظر میں دفاعی ماہرین کا کہنا ہے کہ امریکی بھی مشرق وسطیٰ میں اس کشمکش کا دائرہ کار محدود رکھنے پر مجبور ہیں تاکہ ان کی موجودگی اور خطے میں مستقر دفاعی طاقت کو نقصان نہ پہنچے کیونکہ محور مقاومت نے ابھی تک اپنی طاقت کا ایک چوتھائی بھی مکمل طور پر استعمال نہیں کیا۔ امریکیوں کے نزدیک ان عوامل میں ایک یہ بھی ہے کہ نتن یاہو کا پاگل پن جنگ کی سطح اور دائرہ بڑھا سکتا ہے جس سے محور مقاومت کے تمام بازو خطے میں واضح زمینی برتری کو اپنے حق میں استعمال کر کے صیہونی حکومت کی رگ حیات کاٹ سکتا ہے اور مشرق وسطیٰ کی رائے عامہ کو نہ صرف صیہونی حکومت بلکہ امریکہ کے خلاف مزید بیدار کر سکتا ہے۔ 

اگرچہ کچھ لوگ وائٹ ہاؤس کے اس رویے کو انتخابات کے معاملے تک محدود سمجھتے ہیں لیکن حقیقت میں امریکا مشرق وسطیٰ میں نئی ​​جنگ سے خوفزدہ ہے۔ یہ واضح نہیں ہے کہ امریکہ کب تک صیہونی حکومت کی حمایت کر سکے گا، خاص طور پر جب مزاحمتی قوتوں کی موجودگی میں جب ایران اعلی سطح کی جنگی قوت کا حامل ملک ہے۔ ایرانی ائیر ڈیفنس کی کاروائیوں کی تفصیل ابھی آ رہی ہے، لیکن یہ یقنی ہے تہران اور سمیت تمام شہروں مکمل امن ہے، اس سے کسی نہ کسی طرح یہ ظاہر ہوتا ہے کہ تل ابیب اس آپریشن میں اپنے مقاصد حاصل کرنے میں کامیاب نہیں ہو سکا۔ رائے عامہ کے میدان میں بھی یہ مسئلہ واضح ہے اور دفاعی لحاظ سے بڑے نقصان کی خبریں نہیں ہیں. بڑی بڑی دھمکیوں اور بڑھکوں کے باوجود اسرائیل ایران کیساتھ براہ راست پنچہ آزمائی سے قاصر ہے اور صرف محور مقاومت کیخلاف فلسطین اور لبنان کے شہروں کا نشانہ بنا رہا ہے۔

ایران کے پاس صیہونی کاروائی کا بھرپور جواد دینے کا واضح جواب ہے۔ نہ صرف صیہونی دشمن نے ایرانی سرزمین کو نشانہ بنایا ہے بلکہ اگر اس درندگی کا جواب نہ دیا گیا تو فلسطین اور لبنان کے عوام کیخلاف یہ مزید بھیانک حملے جاری رکھے گا۔ بے شک ایران کو جلدی نہیں لیکن ایران کی دفاعی طاقت کی موجودگی اور اثبات یہ ظاہر کرتا ہے کہ ایران جب چاہے اس کا دوچند جواب دے سکتا ہے اور دے گا، جیسا کہ گذشہ دو آپریشنز وعدہ صادق 1 اور وعدہ صادق 2 میں یہ ثابت ہو چکا ہے۔

اسلام ٹائمز

19 اکتوبر 1962 کو خان یونس کے ایک کیمپ میں آنکھ کھولنے والے یحییٰ ابراہیم حسن السنوار نے ابتدائی تعلیم خان یونس کے اسکول میں ہی حاصل کی اور پھر غزہ کی اسلامک یونیورسٹی سے عربی میں بیچلر کی ڈگری حاصل کی، انہوں نے 5 سال تک یونیورسٹی کی اسٹوڈنٹ کونسل میں خدمات انجام دیں اور پھر کونسل کے چیئرمین اور وائس چیئرمین بھی رہے۔

یحییٰ سنوار کی شادی میں تاخیر کی بڑی وجہ ان کی مسلح جدوجہد اور طویل گرفتاری رہی اور پھر 2011 میں شالت (اسرائیلی فوجی) کی رہائی کی ڈیل کے تحت اسرائیلی جیل سے رہائی پانے کے بعد غزہ کی ایک مسجد میں ان کے نکاح کی تقریب منعقد ہوئی اور پھر یحییٰ کا شمار حماس کی مزاحمتی تنظیم کے سرکردہ رہنماؤں میں ہونے لگا۔

یحییٰ سنوار کے بارے میں ہم کیا جانتے ہیں؟

 

یحییٰ سنوار کو حماس کے سیاسی ونگ اور عزالدین القسام بریگیڈ کی لیڈرشپ کے درمیان روابط قائم رکھنے کا ٹاسک دیا گیا اور پھر 2014 میں اسرائیلی جارحیت کے اختتام پر انہوں نے حماس کے فیلڈ کمانڈرز کی کارکردگی کا تفصیلی جائزہ لینے کے لیے تحقیقات کروائیں جس کے نتیجے میں حماس کے کئی بڑے رہنماؤں کو عہدوں سے بھی ہٹایا گیا۔

ستمبر 2015 میں امریکا نے القسام بریگیڈ کے کمانڈر انچیف محمد الضیف اور سیاسی ونگ کے رہنما راہی مشتہا سمیت یحییٰ سنوارکا نام بین الاقوامی دہشتگردوں کی بلیک لسٹ میں شامل کر دیا۔

13 فروری 2017 کو یحییٰ سنوار  اسماعیل ہنیہ کی جگہ غزہ پٹی میں حماس کے سیاسی ونگ کے سربراہ منتخب ہوئے اور انہوں نے خلیل الحیہ کو اپنا نائب مقرر کیا اور پھر یحییٰ سنوار کو پارٹی انتخابات کے ذریعے غزہ پٹی میں حماس کا سربراہ مقرر کر دیا گیا اور اسماعیل ہنیہ کو خالد مشعل کا جانشین بنا دیا گیا۔

برطانوی اخبار دی گارجین کی 2017 میں شائع ہونے والی ایک رپورٹ کے مطابق یحییٰ سنوار کے حماس میں آنے سے فلسطینی مزاحمتی تنظیم کے سیاسی اور عسکری ونگ میں اندرونی رسہ کشی ختم ہوگئی اور حماس کی پالیسی کو غزہ کے چیلنجز کو مدنظر رکھتے ہوئے دوبارہ سے وضع کیا گیا۔

مئی 2018 میں یحییٰ سنوار نے الجزیرہ پر آکر غیر متوقع اعلان کر دیا کہ حماس پرامن عوامی مزاحمت کی پالیسی اپنائے گی جس کا مقصد ممکنہ طور پر حماس پر بہت سے مملک کی جانب سے لگا دہشتگرد تنظیم کا ٹیگ اتارنا اور اسرائیل کے ساتھ مذاکرات کے لیے کردار ادا کرنا تھا، اس اعلان سے ایک ہفتہ قبل یحیٰ سنوار نے غزہ کے شہریوں سے کہا تھا کہ اسرائیلی زنجیریں توڑ دیں، ہم دب کر مرنے سے شہید ہونے کو ترجیح دیں گے، ہم مرنے کے لیے تیار ہیں اور ہزاروں لوگ ہمارے ساتھ مریں گے۔

یحییٰ السنوار حماس کے نئے سربراہ بن گئے

 

مارچ 2021 میں یحیٰ سنوار دوسری مدت کے لیے غزہ میں حماس کے سربراہ منتخب ہوئے اور انہیں غزہ کا ڈی فیکٹو حکمران تصور کیا جانے لگا اور انہیں حماس میں اسماعیل ہنیہ کے بعد دوسرا طاقتور ترین شخص مانا جانے لگا۔

مئی 2021 میں اسرائیلی فورسز کی جانب سے خان یونس میں یحیٰ اسنوارکے گھر پر بمباری کی گئی تاہم اس حملے میں کسی جانی نقصان کی کوئی اطلاع نہیں ملی اور پھر حملے کے اگلے ہفتے یحیٰ اسنوارکئی بار عوام میں دیکھے گئے اور پھر 27 مئی 2021 کو انہوں نے ایک پریس کانفرنس کے دوران اسرائیلی وزیر دفاع بینی گینتز کو مخاطب کرتے ہوئے کہا کہ میں اپنے قدموں پر چل کر اپنے گھر جاؤں گا، تمھارے پاس مجھے قتل کرنے کے لیے 60 منٹ ہیں اور پھر وہ اگلے ایک گھنٹے غزہ کی گلیوں میں گھومتے رہے اور سیلفیاں لیتے رہے۔

غزہ میں جاری حالیہ جنگ کے ابتدائی تین ہفتوں کے بعد یحیٰ سنوار نے اسرائیل کو پیشکش کی تھی کہ  یرغمال بنائےگئے تمام اسرائیلیوں کے بدلے قیدی بنائےگئے تمام فلسطینیوں کو رہا کر دیا جائے لیکن اسرائیلی وزیراعظم بن یامین نیتن یاہو نے حماس کی پیشکش قبول کرنے سے انکار کرتے ہوئے زمینی کارروائی کا فیصلہ کیا جس کا نقصان انہیں مزید اسرائیلی فوجیوں کی ہلاکت اور فوجی گاڑیوں کی تباہی کی صورت میں برداشت کرنا پڑا۔

 یحییٰ سنوار کو ایرانی دارالحکومت تہران میں حماس کے سربراہ اسماعیل ہنیہ کی شہادت کے بعد  اگست میں حماس کا سربراہ بنایا گیا تھا۔

اسلام دنیا کو امن کا پیغام دیتا ہے اور عالمی انسانی ترقی امن پر یقین رکھنے سے ہی ممکن ہے۔عالمی انسان تہذیب کی تعمیر کے لیے ضروری ہے کہ امن کا دور دورہ ہو۔اسلام امن کا داعی ہے اور اسلام عالمی تہذیب کی تشکیل چاہتا ہے۔ ارشاد باری تعالی ہے:((وَمَا أَرْسَلْنَاكَ إِلَّا كَافَّةً لِّلنَّاسِ بَشِيرًا وَنَذِيرًا وَلَـكِنَّ أَكْثَرَ النَّاسِ لَا يَعْلَمُونَ)) (سبأ-28)

اور ہم نے آپ کو تمام انسانوں کے لیے فقط بشارت دینے والا اور تنبیہ کرنے والا بنا کر بھیجا ہے لیکن اکثر لوگ نہیں جانتے ۔

ہم قرآن مجید کی متعدد آیات میں یہ دیکھتے ہیں کہ اسلام نے امن کو موقع دینے اور سلامتی کی بات کی ہے ارشاد باری تعالی ہوتا ہے:

((وَإِن جَنَحُوا لِلسَّلْمِ فَاجْنَحْ لَهَا وَتَوَكَّلْ عَلَى اللَّـهِ إِنَّهُ هُوَ السَّمِيعُ الْعَلِيمُ)) (الأنفال-61)

اور (اے رسول) اگر وہ صلح و آشتی کی طرف مائل ہو جائیں تو آپ بھی مائل ہو جائیے اور اللہ پر بھروسا کیجیے۔ یقینا وہ خوب سننے والا، جاننے والا ہے۔

((يا أَيُّهَا الَّذِينَ آمَنُوا ادْخُلُوا فِي السِّلْمِ كَافَّةً وَلَا تَتَّبِعُوا خُطُوَاتِ الشَّيْطَانِ إِنَّهُ لَكُمْ عَدُوٌّ مُّبِينٌ) (البقرة-208)

اے ایمان لانے والو! تم سب کے سب (دائرہ ) امن و آشتی میں آ جاؤ اور شیطان کے نقش قدم پر نہ چلو، یقینا وہ تمہارا کھلا دشمن ہے۔

اسلام نے اپنے ایمان لانے والوں کو بار بار امن کی تاکید کی ہے اور امن میں داخل ہونے کاحکم دیاہے۔ اسلام تنازعات کے حل میں تلوار کے استعمال سے منع کرتا ہے یہاں تلوار سے مراد طاقت اور زور ہے۔ اسلام عقیدہ اور نظریہ کے مخالفین کے ساتھ ہر صورت میں جنگ کی بات نہیں کرتا جنگ صرف اس صورت میں کی جاتی ہے جب اپنے عقیدے اور جان کا دفاع کرنا ہو۔ یہ بات تو واضح ہے کہ وہ جنگیں جو صرف دشمنی کی بنیاد پر ہوتی ہیں وہ دراصل شیطان کی پیروی ہو رہی ہوتی ہے اور شیطان یہ چاہتا ہے کہ لوگوں کے درمیان دشمنی اور نفرت کو بھڑکائے۔ اس طرح لوگوں کا خون بہایا جاتا ہے،لوگوں کو ایمان کے راستے سے بھٹکا دیا جاتا ہے اور لوگ اللہ کی گروہی شکل میں نافرمانی کرتے ہیں۔ جنگ اسلام میں ایک روٹین سے ہٹا معاملہ ہے جسے اضطراری حالت میں اختیار کیا جاتا ہے۔ جنگیں مسلمانوں پر ان کو ان کے مذہب سے ہٹانے کے لیے مسلط کی گئی تھیں اور ان کا مقصد مسلمانوں کو تکلیف پہنچانا تھا۔

وہ سیاسی تبدیلیاں اور ان کے نتیجے میں جو جنگیں واقع ہوئیں ان پر غور و فکر کیا جائے تو یہ بات سامنے آتی ہے کہ ان کی وجہ فقط اور فقط اپنی جانوں اور مال کا تحفظ تھا۔ یہ جنگیں اسلام کا نظریہ نہ تھیں کہ ہر صورت میں واقع ہوں کیونکہ اسلام تو امن کا داعی ہے۔اس لیے اسلام نے ان جنگوں کی بھی شرائط قرار دیئے اور اہم شرط یہی تھی کہ اپنے مال و جان کے تحفظ کے لیے ہونی چاہیں۔ اسی طرح انسانوں پر ہونے والے ظلم کو روکنے کے لیے ہونی چاہیں اور جنگ کی ایک بڑی شرط یہ ہے کہ جنگ کا آغاز نہیں کرنا۔ اسلام نے کسی پر اپنا عقیدہ مسلط کرنے کے لیے کبھی جنگ نہیں کی بلکہ ہمیشہ حریت عقیدہ کی تعلیم دی:

((لَا إِكْرَاهَ فِي الدِّينِ قَد تَّبَيَّنَ الرُّشْدُ مِنَ الْغَيِّ فمَن يَكْفُرْ بِالطَّاغُوتِ وَيُؤْمِن بِاللَّـهِ فَقَدِ اسْتَمْسَكَ بِالْعُرْوَةِ الْوُثْقَى لَا انفِصَامَ لَهَا والله سَمِيعٌ عَلِيمٌ )) (البقرة-256)

دین میں کوئی جبر و اکراہ نہیں، بتحقیق ہدایت اور ضلالت میں فرق نمایاں ہو چکا ہے، پس جو طاغوت کا انکار کرے اور اللہ پر ایمان لے آئے، بتحقیق اس نے نہ ٹوٹنے والا مضبوط سہارا تھام لیا اور اللہ سب کچھ خوب سننے والا اور جاننے والا ہے ۔

اسی حکم کی وجہ سے آپ کو کوئی ایک جنگ بھی نہیں ملے گی جو اپنے عقیدے کی نشر و اشاعت کے لیے کی گئی ہو۔اسی لیے اسلام میں ایسا کوئی بھی داعی نہیں ملے گا جس نے تلوار اور جنگ کے ذریعے دین کی دعوت دی ہو۔ نبی اکرم صلی اللہ علیہ وآلہوسلم یہودیوں، مسیحیوں اور کفار کے ساتھ میثاق مدینہ کا معاہدہ کیا اور یہ تینوں عقیدے میں آپ صلی اللہ علیہ وآلہ وسلم کے مخالف تھے۔ اس میں مدینہ کے رہنے والے ہر عقیدے اور ہر فکر کےلوگوں کو امن دیا گیا تھا۔ مدینہ کی حکومت اور قیادت مسلمانوں کے پاس تھی اس کے باوجود انہوں نے کسی کو بھی عقیدہ کی تبدیلی پر مجبور نہیں کیا اور اس کے برعکس یہ کہا کہ تمام عقائد کے ماننے والے مدینہ پر حملہ کی صورت میں باہم مل کر حفاظت کریں گے یہ اس بات کی دلیل ہے کہ اسلام امن کا دین ہے اور عقیدے کی آزادی دیتا ہے اور اسلام عقیدے کے مسائل میں تلوار کو یہ حق نہیں دیتا کہ اس کے ذریعے فیصلہ کیا جائے۔اسی طرح نبی اکرم صلی اللہ علیہ وآلہ وسلم نے مکہ کے مشرکین کے ساتھ صلح حدیبیہ کی تھی اسلام نے ان پر طاقت کے ذریعے اسلام کو مسلط نہیں کیا بلکہ ان کے ساتھ مصالحت کی اور ان کے ساتھ امن کا معاہدہ کیا اور کچھ سالوں بعد آپ صلی اللہ علیہ وآلہ وسلم خون کا ایک قطرہ بہائے بغیر مکہ میں فاتحانہ داخل ہو گئے۔

اسلام کی خوبیوں میں سے ہے کہ اسلام نے ریاست میں بسنےوالوں کو عقیدہ تبدیل کرنے پر مجبور نہیں کیا اور ان کی حفاظت کے بدلے ایک معمولی سا ٹیکس جزیہ کی صورت میں لیا اور یہ اسلام میں داخل ہونے پر مجبور نہیں کیا اور انہوں نے ان کے رسم و رواج اور عقائد کے مطابق زندگی بسر کرنے کی مکمل آزادی دی۔ مسلمانوں پر زکوۃ کو فرض قرار دے دیا کہ وہ ریاست کو ادا کریں گے اس طرح اسلام نے ہر دو پر ریاست چلانے کے لیے ملی بوجھ ڈالا ۔

اسلام امن کا داعی ہے اس پر اسلام کے عملی اقدامات سے چند شواہد:

۱۔عرب کے زیادہ تر قبائل اسلام میں اپنی سوچ و فکر اور دعوت حسنہ کے نتیجے میں داخل ہوئے اور کسی بھی طرح سے تلوار کا استعمال نہیں کیا گیا۔ نبی اکرم صلی اللہ علیہ وآلہوسلم نے اسلام کی دعوت کا یہ خوبصورت طریقہ قرآن کریم کی اس آیت مجیدہ کی روشنی میں قائم فرمایا ارشاد باری تعالی ہے:

((ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُم بِالَّتِي هِيَ أَحْسَنُ إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِ وَهُوَ أَعْلَمُ بِالْمُهْتَدِينَ)) (النحل -125)

(اے رسول) حکمت اور اچھی نصیحت کے ساتھ اپنے رب کی راہ کی طرف دعوت دیں اور ان سے بہتر انداز میں بحث کریں، یقینا آپ کا رب بہتر جانتا ہے کہ کون اس کی راہ سے بھٹک گیا ہے اور وہ ہدایت پانے والوں کو بھی خوب جانتا ہے۔

اس دعوت کے نتیجے میں اسلام قبول کرنے والوں میں عرب کے دو معروف قبیلے اوس و خزرج بھی شامل تھے۔

۲۔اسلام کی دعوت محبت،اسلام کے تعارف اور لوگوں سے حسن سلوک سے دی گئی ارشاد باری تعالی ہوتا ہے:

((يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّـهِ أَتْقَاكُمْ إِنَّ اللَّـهَ عَلِيمٌ خَبِيرٌ)) (الحجرات-13)

اے لوگو! ہم نے تمہیں ایک مرد اور عورت سے پیدا کیا پھر تمہیں قومیں اور قبیلے بنا دیا تاکہ تم ایک دوسرے کو پہچانو، تم میں سب سے زیادہ معزز اللہ کے نزدیک یقینا وہ ہے جو تم میں سب سے زیادہ پرہیزگار ہے، اللہ یقینا خوب جاننے والا، باخبر ہے۔

یہ بات پھر سے واضح کر دیں کہ اس پیغام دعوت کے ساتھ کسی قسم کی جنگ اور  قتل و غارت شامل نہیں ہے کچھ لوگ اس طرح کے جھوٹے الزامات اسلام پر لگاتے ہیں۔

۳۔اسلام میں جنگ مجبوری کی حالت میں ہے اور وہ بھی اس صورت میں جب اور کوئی راستہ نہ ہو۔ اس میں بھی دیکھا جائے تونبی اکرم صلی اللہ علیہ وآلہ وسلم کے زمانے میں جو جنگیں ہوئیں ان کی مجموعی تعداد اسّی بنتی ہے اور ان سب جنگوں میں مسلمانوں اور مشرکین کے مقتولین ملا کر بھی ان کی تعداد ایک ہزار سے کم ہے۔

۴۔اسلام نے ایک نظریہ کے طور پر غیر مسلموں کو ان کے عقیدہ اور ان کے رسوم و رواج کے مطابق زندگی گزارنے کے بدلے ایک معمولی سا ٹیکس رکھا جسے جزیہ کہا جاتا ہے۔

۵۔اسلام نے قتل و غارت کو ایک دفاعی حکمت عملی کے طور پر اختیار کیا اور اس کے ذریعے ظالموں کو ان کے ظلم سے روکنا تھا اور مظلوموں کو ان سے نجات دلانا تھی یہ کوئی ایسا عمل نہیں جس کو پسندیدگی کے ساتھ اسلام نے اختیار کیا ہو ارشاد باری تعالی ہوتا ہے:

((كُتِبَ عَلَيْكُمُ الْقِتَالُ وَهُوَ كُرْهٌ لَّكُمْ .............)) (البقرة-216)

تمہیں جنگ کا حکم دیا گیا ہے جب کہ وہ تمہیں ناگوار ہے اور ممکن ہے کہ ایک چیز تمہیں ناگوار گزرے۔

اسلام میں جنگ کب کی جا سکتی ہے؟

یہ بات بار بار کی جا چکی ہے کہ اسلام امن کا داعی ہے وہ لوگوں کو اپنی طرف بہترین انداز میں دعوت کے ذریعے بلاتا ہے۔اسلام جنگ کی اجازت کچھ شرائط کے ساتھ دیتا ہے اسلام اصل میں جنگ کے خلاف ہے کیونکہ جنگ انسانی تہذیب پر بھیانک اثرات مرتب کرتی ہے۔اسلام میں جنگ کی مندرجہ شرائط ہیں:

۱۔یہ جنگ ایمان اور عقیدے کی حفاظت کے لیے ہو دشمن  مسلمانوں پر ان کے  عقیدے کی وجہ سے ظلم کر رہے ہوں ارشاد باری تعالی ہے:

((أُذِنَ لِلَّذِينَ يُقَاتَلُونَ بِأَنَّهُمْ ظُلِمُوا وَإِنَّ اللَّـهَ عَلَى نَصْرِهِمْ لَقَدِيرٌ)) (الحج-39)

۳۹۔ جن لوگوں پر جنگ مسلط کی جائے انہیں (جنگ کی) اجازت دی گئی ہے کیونکہ وہ مظلوم واقع ہوئے اور اللہ ان کی مدد کرنے پر یقینا قدرت رکھتا ہے۔

۲۔ان لوگوں سے جنگ کرنا جو مسلمانوں سے نفرت اوربغض پھیلا کر لڑنے پر اکساتے ہیں اور جارحیت کی مسلسل ترغیب دیتے ہیں ارشاد باری تعالی ہوتا ہے:

 ((وَقَاتِلُوهُمْ حَتَّى لَا تَكُونَ فِتْنَةٌ وَيَكُونَ الدِّينُ لِلَّـهِ فَإِنِ انتَهَوْا فَلَا عُدْوَانَ إِلَّا عَلَى الظَّالِمِينَ)) (البقرة-193)

اور تم ان سے اس وقت تک لڑو کہ فتنہ باقی نہ رہے اور دین اللہ ہی کے لیے ہو جائے، ہاں اگر وہ باز آ جائیں تو ظالموں کے علاوہ کسی کے ساتھ زیادتی نہ ہو گی۔

اسلام نے اس وقت جنگ سے منع کیا ہے جب یہ لوگ اپنی دشمنی اور جنگ کی خواہش سے بعض آ جائیں۔

۳۔وہ لوگ جن پر ظلم کیا جا رہا ہو اگر وہ مسلمانوں سے مدد مانگتے ہیں تو ان کے دفاع کے لیے جنگ کرنا اس میں یہ بھی شرط نہیں ہے کہ ان مدد مانگنے والے غیر مسلموں اور مسلمانوں کے درمیان میں کوئی دفاعی معاہدہ ہوا ہو یا نہ ہوا ہو ان کی حفاظت کی جائے گی ارشاد باری تعالی ہے:

((.....وَإِنِ استنصروكم فِي الدِّينِ فَعَلَيْكُمُ النَّصْرُ إِلَّا عَلَى قَوْمٍ بَيْنَكُمْ وَبَيْنَهُم مِّيثَاقٌ وَاللَّـهُ بِمَا تَعْمَلُونَ بَصِيرٌ)) (الأنفال-72)

البتہ اگر انہوں نے دینی معاملے میں تم لوگوں سے مدد مانگی تو ان کی مدد کرنا تم پر اس وقت فرض ہے جب یہ مدد کسی ایسی قوم کے خلاف نہ ہو جن کے اور تمہارے درمیان معاہدہ ہے اور اللہ تمہارے اعمال پر خوب نظر رکھتا ہے۔

اسلام کی جنگی شرائط اور ضابطے

۱۔دشمن کو دیکھتے ہی جنگ شروع نہیں کر دی جائے گی بلکہ جنگ سے پہلے ان کے ساتھ عقل اور امن کی زبان میں بات کی جائے گی کیونکہ نبی اکرم صلی اللہ علیہ وآلہ وسلم اور آپ ص کے وصی حضرت علی علیہ السلام کی یہی وصیت تھی آپ جنگ صفیں میں اپنے لشکر سے فرمایا کرتے تھے ان کے شروع کرنے سے پہلے جنگ نہ کرو ،اللہ کا شکر ہے کہ تم دلیل رکھتے ہو تم رکے رہو یہاں تک کہ وہ جنگ شروع کرکے تمہارے لیے دوسری حجت بھی فراہم کر دیں۔ آپؑ اپنے فرزند امام حسن علیہ السلام سے فرمایا کرتے تھے تم پہلے مبارزہ کی دعوت نہ دو۔

۲۔جنگ لڑنے والوں کے ساتھ کی جائے گی اور اس کے علاوہ کسی بشر و غیر بشر کو نقصان نہیں پہنچایا جائے گا۔ جنگ میں جتنا ہو اخلاقیات اور انسانیت کا خیال رکھا جائے۔ نبی اکرم صلی اللہ علیہ وآلہ وسلم اپنی لشکر کو وصیت فرماتے تھے کہ خیانت نہ کرنا، بد عہدی نہ کرنا، مثلہ نہ کرنا، کسی بچے کو قتل نہ کرنا، کھجور کو مت کاٹنا، پانی میں غرق مت کرنا، کسی پھلدار درخت کو مت کاٹنا، زراعت کو مت جلانا کوئی پتہ نہیں کہ تمہیں اس کی ضرورت پڑجائے، جن جانوروں کا گوشت کھایا جاتا ہے انہیں ضرورت کے سوا مت مارنا۔ اسی طرح امام علیؑ نے حضرت مالک اشتر ؓ کو اس وقت خط لکھا جب وہ بصرہ کے محاذ پر حضرت ؑکے لشکر کے پہلے حصے کے سربراہ تھے کہ جولڑنا نہیں چاہتا اس پر طعن نہ کرنا،جو بھاگ رہا ہو اسے قتل نہ کرنا، جو دروازہ بند کر لے اسے امان حاصل ہے۔

۳۔غیر مسلموں کو اجارے پر لیا جاسکتا ہے اور ان کو جنگ کے دوران قتل سے امان دی جا سکتی ہے نبی اکرم صلی اللہ علیہ وآلہ وسلم نے ارشاد فرمایا کوئی بھی مسلمان جو ادنی ہو یا اعلی ہو جب وہ کسی غیر مسلمان کو دیکھتا ہے تو وہ اس کا پڑوسی بن جاتا ہے یہاں تک کہ وہ غیر مسلم اللہ کے کلام کو سن لے اور تمہاری پیروی کرے تو وہ تمہارا دینی بھائی ہے اور اگر وہ انکار کر دے تو اسے امان دو اور اللہ سے ڈرتے رہو۔ حضرت رسالت مآب صلی اللہ علیہ وآلہ وسلم نے ایک نامہ حضرت علیؑ کو لکھا جس میں تحریر فرمایا خدا سے کیے گئے عہد میں خیانت نہ کرو،اس کی ذمہ داری کو پورا کرو،اللہ تعالی نے ذمہ اور عہد کو امان قرار دیا ہے اور اپنے بندوں کے درمیان رحمت بنایا، تنگ دستی میں صبر کرو راحت کی امید  خیانت سے اچھی ہے جس کے پیچھے برائی چلی آتی ہے۔

۴۔مظلوم اور مستضعفین کی  جابرین اور فسادیوں کے خلاف مدد کرنا اللہ تعالی ارشاد فرماتا ہے:

((وَمَا لَكُمْ لَا تُقَاتِلُونَ فِي سَبِيلِ اللَّـهِ وَالْمُسْتَضْعَفِينَ مِنَ الرِّجَالِ وَالنِّسَاءِ وَالْوِلْدَانِ الَّذِينَ يَقُولُونَ رَبَّنَا أَخْرِجْنَا مِنْ هَـذِهِ الْقَرْيَةِ الظَّالِمِ أَهْلُهَا وَاجْعَل لَّنَا مِن لَّدُنكَ وَلِيًّا وَاجْعَل لَّنَا مِن لَّدُنكَ نَصِيرًا)) (النساء-75)

 (آخر) تم لوگوں کو کیا ہو گیا ہے کہ تم اللہ کی راہ میں اور ان بے بس کیے گئے مردوں عورتوں اور بچوں کی خاطر نہیں لڑتے جو پکارتے ہیں: اے ہمارے رب! ہمیں اس بستی سے نکال جس کے باشندے بڑے ظالم ہیں اور اپنی طرف سے کسی کو ہمارا سرپرست بنا دے اور اپنی طرف سے کسی کو ہمارے لیے مددگار بنا دے؟