شیعہ نیوز: اسلامی جمہوریہ ایران کی فوج نے اعلان کیا ہے کہ گزشتہ 24 گھنٹوں کے دوران 13 حملہ آور ڈرون مشترکہ فضائی دفاعی ہیڈکوارٹر کے مربوط دفاعی نیٹ ورک کے ذریعے تباہ کر دیے گئے۔ تسنیم کے مطابق، ایرانی فوج نے اعلامیہ نمبر 16 میں بتایا کہ گزشتہ 24 گھنٹوں کے دوران جدید ڈرونز کی مختلف اقسام، جن میں MQ-9 Reaper، Hermes drone اور Orbiter drone شامل ہیں، کو مشترکہ فضائی دفاعی ہیڈکوارٹر کے مربوط نیٹ ورک نے تباہ کر دیا۔ اعلامیے کے مطابق، گزشتہ 24 گھنٹوں میں 13 جدید ڈرون ایرانی فوج اور سپاه پاسداران انقلاب اسلامی کے زمینی دستوں اور فضائی دفاعی نظام کے میزائل اور توپخانے کے ذریعے، جو ملکی مشترکہ فضائی دفاعی ہیڈکوارٹر کی کمان میں کام کر رہے ہیں، شمال مغرب، مغرب، جنوب، اصفہان، کرمان اور تہران کے علاقوں میں نشانہ بنا کر گرائے گئے۔ اسی اعلامیے میں مزید کہا گیا ہے کہ امریکی صہیونی دشمن کی جارحیت کے آغاز سے اب تک ایرانی فوج اور سپاہ کے فضائی دفاعی نظام کے ذریعے گرائے گئے ڈرونز کی تعداد 82 تک پہنچ چکی ہے۔

پینٹاگون کے سابق مشیر ڈوگلاس میک گریگر نے کہا: ایران کی میزائل ٹیکنالوجی کی ترقی امریکی توقعات سے کہیں زیادہ ہے۔ ایرانی میزائل جدید دفاعی سسٹمز کو عبور کرتے ہیں۔

انہوں نے مزید کہاکہ اسرائیل کا آئرن ڈوم میزائل سسٹم اچھی طرح سے ناکام ہوچکا ہے۔ اگرچہ امریکہ اسرائیل کی دفاعی مدد کے لیے میزائل چلاتا ہے، لیکن ایسا لگتا ہے کہ ایرانیوں نے میزائل ٹیکنالوجی میں بہت زیادہ ترقی کی ہے جس سے ہم ناواقف تھے۔

میک گریگر نے کہا کہ ایرانی ہمیں ڈمی وار ہیڈز کے ساتھ الجھ سکتے ہیں اور اصل میزائل، جو زیادہ خطرناک ہے، ہمارے دفاعی سسٹم کو تباہ کر سکتا ہے۔ میزائل ٹریکنگ کا عمل اچھا نہیں چل رہا ہے۔

انہوں نے مزید کہا کہ امریکی میڈیا ہمیشہ کی طرح امریکی اور اسرائیل کی فوجی کارکردگی کی بڑھا چڑھا کر پیش کر رہا ہے۔ مجھے یقین ہے کہ دنیا والے اس پر یقین نہیں کریں گے۔

انقلابِ ایران بیسویں صدی کا وہ عظیم سیاسی و روحانی واقعہ تھا جس نے نہ صرف مشرقِ وسطیٰ کی سیاست کا رخ بدلا بلکہ استعماری نظامِ فکر کے مقابل ایک نئے نظریاتی ماڈل کو بھی جنم دیا۔ اس انقلاب کی فکری بنیادیں تو امام خمینیؒ کی قیادت میں استوار ہوئیں مگر اس انقلاب کی بقا، استحکام اور تدریجی ارتقا میں جن شخصیات نے کلیدی کردار ادا کیا، ان میں نمایاں نام شہید آیت اللہ سید علی خامنہ ای کا ہے۔ آیت اللہ خامنہ ای نے اپنی عملی زندگی کا آغاز ہی شاہی آمریت کے خلاف جدوجہد سے کیا۔ جوانی کے ایام میں وہ نہ صرف فکری محاذ پر سرگرم رہے بلکہ جیلوں اور جلاوطنی کی صعوبتیں بھی برداشت کیں۔

ان کی شخصیت میں انقلابی جوش، دینی بصیرت اور سیاسی حکمت کا ایسا حسین امتزاج تھا جس نے انہیں انقلاب کے فعال سپاہیوں میں شامل کر دیا۔ ان کی قربت اور فکری ہم آہنگی انہیں امامِ انقلاب، آیت اللہ روح اللہ خمینی کے نزدیک لے آئی اور یہی نسبت بعد ازاں ان کے کردار کو مزید مؤثر بنانے کا سبب بنی۔ انقلاب کے بعد جب ایران ایک نئے سیاسی و سماجی تجربے سے گزر رہا تھا، اس وقت داخلی انتشار، بیرونی سازشوں اور جنگی دباؤ نے اسلامی نظام کو کمزور کرنے کی بھرپور کوشش کی۔

ایسے نازک مرحلے پر آیت اللہ خامنہ ای نے مختلف اہم ذمہ داریاں سنبھالیں، خواہ وہ وزارتِ دفاع کے میدان میں رہنمائی ہو یا خطیبانہ اسلوب میں قوم کی فکری تربیت۔ انہوں نے اپنی تقاریر کے ذریعے انقلاب کے اصول،استقلال، آزادی اور اسلامی حاکمیت کا ایک ایسا فکری بیانیہ عطا کیا گیا جس نے نوجوان نسل کو نظریاتی استقامت فراہم کی۔ آٹھ سالہ ایران عراق جنگ انقلاب کے لیے سب سے بڑا امتحان تھی۔ اس جنگ میں آیت اللہ خامنہ ای نے محض ایک سیاسی رہنما کے طور پر نہیں بلکہ ایک مجاہدِ فکر و عمل کے طور پر کردار ادا کیا۔ ان کی موجودگی محاذِ جنگ پر سپاہیوں کے لیے حوصلے کا سرچشمہ تھی اور ان کے خطابات میں صبر، ایثار اور شہادت کی روح کو تازگی ملتی رہی۔

یہی وہ زمانہ تھا جب انہوں نے “مقاومت” کو ایک نظریہ بنا کر پیش کیا، جو بعد ازاں ایران کی خارجہ اور داخلی پالیسیوں کا بنیادی ستون بن گیا۔ امام خمینیؒ کے وصال کے بعد جب قیادت کا حساس مرحلہ آیا تو آیت اللہ خامنہ ای کو نظامِ ولایتِ فقیہ کا امین منتخب کیا گیا۔ بطور رہبرِ انقلاب انہوں نے نہایت حکمت کے ساتھ ریاستی اداروں کو متوازن رکھا، نظریاتی خطوط کو محفوظ کیا اور نظام کو درپیش داخلی و خارجی چیلنجز کا مقابلہ کیا۔ ان کی قیادت کا بنیادی وصف یہ رہا کہ انہوں نے انقلاب کو محض ایک تاریخی واقعہ نہیں رہنے دیا بلکہ اسے ایک مسلسل جاری عمل میں تبدیل کر دیا۔ اس مقصد کے لیے انہوں نے “ثقافتی خودکفالت”، “اقتصادی مزاحمت” اور “علمی پیش رفت” جیسے تصورات کو فروغ دیا۔

شہید رہبر معظم کی شخصیت کا ایک نمایاں پہلو ان کا علمی و ادبی ذوق بھی تھا۔ وہ صرف ایک سیاسی رہنما نہیں بلکہ ایک صاحبِ مطالعہ مفکر اور ادیب بھی تھے۔ ان کی تحریروں اور تقاریر میں اسلامی تہذیب کی گہرائی، فارسی ادب کی لطافت اور معاصر سیاسی شعور کی پختگی نمایاں نظر آتی ہے۔ انہوں نے اس امر پر زور دیا کہ انقلاب کی اصل حفاظت اس کے فکری اور تہذیبی محاذ پر ہوتی ہے نہ کہ صرف عسکری قوت سے۔ یہی وجہ ہے کہ انہوں نے تعلیم، میڈیا اور ثقافت کو انقلاب کے بنیادی ستونوں میں شمار کیا۔

ان کی قیادت میں ایران نے خود کو ایک مزاحمتی قوت کے طور پر پیش کیا جو عالمی استکبار کے سامنے جھکنے کے بجائے خود انحصاری اور نظریاتی استقامت کو ترجیح دیتی ہے۔ ان کے بیانات میں “امتِ مسلمہ کی وحدت” اور “مظلوم اقوام کی حمایت” ایک مستقل موضوع کے طور پر موجود رہی ہے۔ یوں وہ نہ صرف ایران بلکہ عالمِ اسلام میں ایک فکری رہنما کے طور پر بھی دیکھے جاتے ہیں۔ اس ساری گفتگو کا حاصل یہ ہے کہ اگر انقلابِ ایران ایک درخت ہے تو امام خمینیؒ نے اس کا بیج بویا اور آیت اللہ خامنہ ای نے اسے مسلسل آبیاری، نگہبانی اور طوفانوں سے حفاظت کے ذریعے تناور درخت میں بدلنے کی کوشش کی۔

ان کی قیادت میں اسلامی جمہوریہ ایران نے نظریاتی بقا، سیاسی استحکام اور عالمی سطح پر خودمختار شناخت کو برقرار رکھا۔ اس طرح آیت اللہ خامنہ ای کا کردار محض ایک سیاسی رہبر کا نہیں بلکہ ایک ایسے فکری معمار کا ہے جس نے انقلاب کی روح کو زمانے کے تغیرات کے باوجود زندہ رکھا اور اسے ایک مستقل و پائدار نظام میں ڈھال دیا۔ یہی ان کی سب سے بڑی خدمت ہے کہ انہوں نے انقلاب کو ماضی کی یادگار نہیں بلکہ حال کا شعور اور مستقبل کی امید بنا دیا۔

تحریر: پروفیسر سید تنویر حیدر نقوی

میں آج یہ تحریر اشک بار آنکھوں کے ساتھ لکھ رہا ہوں، مجھے نہیں معلوم کہ کس طرح کے الفاظ کا چنائو کروں لیکن میں یہ سمجھتا ہوں کہ میری دنیا اجڑ چکی ہے۔ زندگی جینے کا مزہ بھی ختم ہو چکا ہے۔ ایک کے بعد ایک شہادت جس میں شہید اسماعیل ہانیہ ہوں، شہید یحٰی سنوار ہوں، شہید حسن نصر اللہ ہوں اور شہید ہاشم صفی الدین کے ساتھ ابو عبیدہ اور ابو حمزہ جیسے دیگر درجنوں سیکڑوں شہیدوں کی شہادت گذشتہ ڈھائی سال میں ہو چکی ہے اور اب ان تمام شہیدوں کے امام یعنی امام شہیدان حضرت آیت اللہ سید علی خامنہ ای بھی شہادت کے مرتبہ پر فائز ہو چکے ہیں۔ دل اور دماغ دونوں ہی قبول کرنے کو تیار نہیں ہیں لیکن یہ ایک کڑوی اور تلخ حقیت ہے جسے قبول کرنا ہوگا۔

آیت اللہ خامنہ ای 86 سال کی عمر میں شہید ہوئے، انہوں نے پوری زندگی اسلام کی خدمت کے ساتھ ساتھ مسلمانوں میں باہمی اتحاد اور تعاون کو فروغ دینے کی بیش بہا کوشش جاری رکھی۔ یہاں تک کہ جب ان کے دفتر پر امریکہ اور اسرائیل نے حملہ کیا تو وہ اس وقت بھی اپنے دفتری کاموں میں مصروف تھے۔ وہ زمین پر ولی اللہ تھے۔ وہ ہمیشہ شہادت کے طلبگار تھے۔ وہ صرف ایران کے رہنما یا رہبر نہیں بلکہ پوری دنیا میں مسلمانوں کے عظیم رہنما تھے اور ساتھ ساتھ دنیا بھر کے ان تمام حریت پسندوں کے آئیڈیل تھے جو دنیا میں ظلم کے خاتمہ کی جدوجہد میں کسی نہ کسی طرح شامل ہیں۔ وہ مظلوموں کی امیدوں کا محور تھے۔ وہ فلسطین کی آزادی کے علمبردار تھے۔ انہوں نے پہلے ہی بتا دیا تھا کہ چاہے وہ زندہ ہو ں یا نہ ہوں آپ لوگ قدس کو آزاد دیکھیں گے اور قدس میں نماز ادا کریں گے۔

آیت اللہ خامنہ ای کی شہادت کا درد ہمیشہ ہمارے دل میں رہے گا۔ دنیا میں آنے والی نسلیں ہمیشہ آیت اللہ خامنہ ای کی سیرت سے درس حاصل کریں گی۔ لیکن یہ فراق ہم جیسوں سے قابل برداشت نہیں ہے۔ دنیا بھر میں ان کے عاشق ایک عجیب سی کیفیت میں مبتلا ہیں ۔لیکن یہ کیفیت ہمیں کسی مایوسی کی طرف نہ لے جائے۔ خبردار ہمیں ہوشیار رہنا ہوگا۔ آیت اللہ خامنہ ای دنیا کے بہترین اور شریف النفس انسان تھے جس کو دنیا کے بد ترین او ذلیل النفس ٹرمپ نے قتل کیا۔ یہ ٹھیک اسی طرح ہے جیسے سنہ 61 ہجری کی کربلا میں اس وقت دنیا کا بہترین اور شریف النفس انسان امام حسین (ع) دنیا کے بد ترین اور ذلیل النفس یزید اور اس کے حواریوں کے نرغہ میں قتل ہوا تھا۔ یہی امام خامنہ ای کے شایان شان ہے کہ امام حسین (ع) کی طرح دور حاضر کی کربلا میں اپنے اہل و عیال کے ساتھ شہادت پائیں اور اللہ نے انہیں یہ اعزاز عطا کیا ہے۔

جب غم سینہ پھاڑ کر نکلتا ہے تو آنکھوں سے بے تحاشہ اشک بھی نکل آتے ہیں، یہ درد آسانی سے ختم ہونے والا نہیں ہے لیکن اس درد میں جو بات ہمیں سہارا دیتی ہے وہ یہ ہے کہ جنگ احد میں جب کفار و مشرکین نے پیغمبر اکرم (ص) کے بارے میں جھوٹی خبر پھیلائی تھی تو قرآن مجید میں سورۃ آل عمران آیت 144 میں اللہ نے فرمایا حضرت محمد صلی اللہ علیہ وآلہ وسلم صرف رسول ہی ہیں، ان سے پہلے بہت سے رسول ہو چکے ہیں، کیا اگر ان کا انتقال ہو جائے یا یہ شہید ہو جائیں، تو تم اسلام سے اپنی ایڑیوں کے بل پھر جاؤ گے؟ اور جو کوئی پھر جائے اپنی ایڑیوں پر تو ہرگز اللہ تعالیٰ کا کچھ نہ بگاڑے گا، عنقریب اللہ تعالیٰ شکر گزاروں کو نیک بدلہ دے گا۔ یہ آیت ہمیں بتاتی ہے کہ اگر رسول بھی چلے جائیں تو رسول کا خدا تو زندہ ہے۔

آج ہم امام خامنہ ای کی شہادت پر سوگوار تو ہیں اور غمزدہ بھی ہیں لیکن ہمیں یاد رکھنا چاہیئے کہ جس خدا نے خامنہ ای کو خامنہ ای بنایا یعنی خامنہ ای کا خدا آج بھی زندہ ہے، باقی ہے، دین اسلام باقی ہے، معرکہ حق و باطل باقی ہے۔ جب تک معرکہ حق و باطل باقی ہے تو ہم بھی باقی ہیں۔ پس یہ جملہ کہ جس میں ہم کہتے ہیں کہ خامنہ ای کا خدا زندہ ہے یقینی طور پر دنیا کے مظلوموں کو ایک ڈھارس دیتا ہے اور یہ تقاضہ کرتا ہے کہ اپنے کام کو جاری رکھیں، مشن سے کوتاہی نہ کریں، سستی نہ کریں، آپس میں اتحاد کو قائم رکھیں، دشمن کا ہر محاذ پر مقابلہ کریں جیسے ہمارے امام خامنہ ای نے کیا ہے۔

یقین رکھیں خامنہ ای کا خدا زندہ ہے، یہ صرف ایک جملہ نہیں، یہ ایک یقین ہے۔ یہ اعلان ہے کہ حق کا رب زندہ ہے، عدل کا رب زندہ ہے، مظلوموں کا سہارا زندہ ہے۔ جب دنیا کی بڑی طاقتیں اپنے اسلحہ خانوں اور میڈیا کی یلغار پر غرور کرتی ہیں، تب اہلِ ایمان یہ کہتے ہیں: خدا زندہ ہے اور جب خدا زندہ ہے تو امید بھی زندہ ہے، فتح بھی زندہ ہے، اور کامیابی بھی یقینی ہے۔ آیت اللہ علی خامنہ ای کی جدوجہد کا مرکز یہی یقین ہے کہ طاقت کا سرچشمہ ٹینک اور طیارے نہیں بلکہ ایمان، صبر اور استقامت ہیں۔ تاریخ گواہ ہے کہ جب بھی باطل نے خود کو ناقابلِ شکست سمجھا، اسی لمحے اس کے زوال کا آغاز ہوا۔ فرعونوں کی سلطنتیں ہوں یا جدید استعمار کی قوتیں سب کو وقت نے مٹا دیا، کیونکہ خدا کا قانون اٹل ہے: ظلم باقی نہیں رہتا۔

آج اگر امریکہ اور غاصب صیہونی ریاست اسرائیل اپنی عسکری طاقت پر نازاں ہیں، تو انہیں یاد رکھنا چاہیئے کہ طاقت کا غرور سب سے بڑی کمزوری ہوتا ہے۔ جو قومیں انصاف کو پامال کرتی ہیں، معصوموں کے خون سے اپنے ہاتھ رنگتی ہیں اور اقوامِ عالم کی آواز کو دبانے کی کوشش کرتی ہیں، وہ اندر سے کھوکھلی ہو جاتی ہیں۔ تاریخ کے اوراق چیخ چیخ کر بتاتے ہیں کہ ظاہری طاقت کے باوجود اخلاقی شکست سب سے بڑی شکست ہوتی ہے۔ حق کی آواز کو خاموش نہیں کیا جا سکتا۔ خامنہ ای کا خدا زندہ ہے۔ اس کا مطلب یہ ہے کہ فلسطین کی مائیں اکیلی نہیں، غزہ کے بچے بے سہارا نہیں ہیں اور حریت کی آواز دبائی نہیں جا سکتی۔ ہر آنسو جو مظلوم کی آنکھ سے گرتا ہے، وہ خدا کی عدالت میں گواہی بنتا ہے اور خدا کی عدالت میں دیر ہو سکتی ہے، اندھیر نہیں۔

یہ یقین ہمیں سکھاتا ہے کہ مایوسی کفر کے قریب لے جاتی ہے اور امید ایمان کی روح ہے۔ جب اہلِ حق استقامت دکھاتے ہیں تو دشمن کی صفوں میں خوف اترتا ہے۔ آج دنیا بھر میں بیداری کی لہر اس بات کا ثبوت ہے کہ باطل کے بیانیے کمزور ہو رہے ہیں اور حق کی آواز مضبوط ہو رہی ہے۔ یہ وہ مرحلہ ہے جب طاقتور سمجھنے والے کمزور ہو رہے ہیں اور مظلوم سمجھے جانے والے تاریخ کا رخ موڑ رہے ہیں۔ظلم کی رات جتنی بھی طویل ہو، سحر ضرور طلوع ہوتی ہے۔

امریکہ اور اسرائیل کی پالیسیوں کی بنیاد جبر اور استحصال پر ہے، اور جبر کی بنیادیں ہمیشہ کمزور ہوتی ہیں۔ ان کی ناکامیاں ان کے اپنے فیصلوں، داخلی اختلافات اور اخلاقی دیوالیہ پن سے جنم لے رہی ہیں۔ دنیا کی رائے عامہ بدل رہی ہے، نوجوان نسل سوال اٹھا رہی ہے، اور حق کی حمایت عالمی سطح پر بڑھ رہی ہے۔ جی ہاں ہمیں یقین ہے کہ خامنہ ای کا خدا زندہ ہے۔ وہ خامنہ ای کا خدا جو شکست نہیں کھاتا، وہ خامنہ ای کا خدا جومظلوموں کو تنہا نہیں چھوڑتا، وہ خامنہ ای کا خدا جو حق کو غالب کرے گا، جی ہاں خامنہ ای کا خدا زندہ ہے۔

تحریر: ڈاکٹر صابر ابومریم
سیکرٹری جنرل فلسطین فاؤنڈیشن پاکستان